呔仔語言治療(二)

上回講到治療師發現呔仔發音既情況都幾難攪。聽到果刻都有D受難又有D 眼濕濕。

見到呔仔咁天真，佢都唔知自己有問題，有時朋友同佢傾計會扮佢講野，我知無惡意，但都幾唔開心。驚hurt到呔仔嘛，怕佢以為人地笑佢。又或者當佢猛咁重覆，人地都聽唔明，我又會好緊張佢既反應。

好彩一直以來佢都係開心仔，唔會對呢D事敏感，所以都無試過因此而受打擊。佢有問點解要去學講野，我同佢講，好多小朋友咁細個發音都唔正，都需要去學，學左講野叻好多架~ 媽咪細個都有學架 ？(係呀響佢心目中我做咩都係好架嘛！佢聽完好似放心左，仲話 「哦~ 原來你都有學架咩?」)

不過好快我既難受感就無左，因為每次去做治療，center入面都有好多唔同情況既小朋友，有D戴助聽器，有D過渡活躍咁，都係一D 有問題既小朋友。見到佢地同佢地既爸媽，其實好心up，佢地湊小朋友既路真係唔易行。心諗呔仔呢D小問題又算得係咩? 自已經係好幸運既一群了。
當時係2012年9月左右，呔仔3歲9個月剛開始返學。治療師就安排呔仔逢星期4放學去練習1小時，佢會設計一套適合呔仔情況既治療計劃比佢。除左每星期1小時佢幫呔仔既練習外，我亦要每日響屋企同呔仔練習，佢先會容易改善。
記得治療師講過，如果平時佢發音唔準，唔好捉住個字黎教或者叫佢跟我地講。因為佢真係未講到，猛叫佢講反而驚佢怕自己講錯而唔肯講。但我地可以清楚地重覆佢講錯既句字。例如佢話 「媽咪我想計健kee呀」 我地就可以講返岩比佢聽 「你想睇咩電視呀? 睇Fireman Sam電視好無呀?」之類可以重覆正確發音既回應。

吹笛既方式，係我同呔仔面對面坐直，我渣住支笛比佢吹一下，就拎返出黎，要一下一下咁吹。而治療師只要求佢每日吹到2次靚聲，即係聽起黎好聽，無漏氣無走音無高音，唔准咬只可用咀唇夾。不過呢個「靚聲」我話你知真係吹來不易呀！我地平常只要隨便吹，但呔仔練習好耐先可以吹得1次好聽咋！