呔媽專欄#218｜「咖喱飯事件」悟出人生道理

活咗37個年頭，唔多唔少對人生有點經歷，從經歷體會中又悟出一點人生道理。作為媽媽，講得變態點，我其實唔想兩個仔嘅成長太暢順，太容易。

我覺得無論任何年紀，都應該發生一啲事，而呢啲事可能係令人唔開心，可能令人矛盾，甚至唔知點去面對。表面睇嚟，呢一切都唔係好事，但其實呢啲經歷，先至係你成長中最珍貴嘅點滴。

遇到唔同嘅事，你會搵人傾訴丶分享，會尋求解決方法，然後你豐富咗自己，再有同類事情發生嘅時候，你已經識得點去面對，已經唔會再咁驚慌。從中，你又會知道邊一啲人會係你真正嘅朋友，邊一啲人在你有事嘅時候，會離棄你。

咖喱飯的啟示

今日大仔響學校發生咗件小事，放學同我講時，我教佢可以用一個點樣嘅心態去面對。話說今日兩個仔都帶咗日式咖喱飯做lunch，大仔放學時有啲唔開心，佢話佢打開盒咖喱飯時，身邊幾個同學話臭，叫佢唔好打開，又話佢舊咖喱牛肉似poo poo，結果佢話只係食咗白飯，費事啲同學響度嘈，佢好怕呢啲情況，佢十級易尷尬。而細仔就話啲同學冇嘢喎，仲好羡慕添！

咁我就問大仔，你覺得食咖喱飯有冇問題呢？如果件事你認為冇問題，又冇阻到人，其實唔需要理其他人點講。大仔話，啲咖喱都有陣味… 咁我舉咗個例，教佢點樣去決定佢應唔應該食咖喱飯，聽落有點無聊，但其實當我哋對事情有個想法，第時就會懂得套用落別的情況，我認為要袋實㗎！

好喇，如果係響戲院，你無啦啦睇睇下戲，拎盒咖喱飯出嚟食，成戲院啲人睇緊戲焗聞，你覺得應唔應該？又如果換個地方，係室內球場，你打完波好肚餓，小休時拎盒咖喱飯出嚟食，你又覺得有冇問題？以上兩個例子，我就覺得唔應該食有味嘅嘢，因為大家焗在室內，唔係人人想聞飯味，如肚餓可以零食麵包餅乾代替，呢個係最基本做每件事前要諗下其他人。

君子和而不同

大仔個飯係 lunch time 響飯堂食，全飯堂都係食物味，根本冇影響人，我認為唔需要因為同學講兩句，就連飯都唔敢食。個情況已經唔係講緊兜咖喱，而係講緊生活上你點解會因為人哋食一啲你唔鍾意或未試過嘅嘢，而畀hardtime人哋？ 正所謂有好多嘢你唔識欣賞，並不一定唔好，可能係你自己見識少！我一向教佢哋，即使你唔認同別人，你唔欣賞某啲事，當果件事影響唔到你的話，你係需要尊重別人嘅選擇，至少令人感覺舒服。

唔影響別人嘅情況下，其實我唔太理人點睇，更加唔會為咗別人說三道四，而改變自己處事方式，可以話性格比較隨心，比較我行我素。有啲嘢，我覺得需要堅持，為自己爭取都係一種學習，至少要活得快樂，舒服自在。

太在意別人對自己評價，別人目光，其實好辛苦，生命只一次，好好為自己而活吧！