呔媽專欄｜中女多自在

近年個人愈來愈中女，咁36歲都真係中女嘅年紀啦，唔知係咪生咗兩件，又埋身餵咗兩年人奶，咩都畀晒兩個仔，我就好似得番個殼咁，個人好虛。

未生之前，響美國呢邊，冬天都成日著短袖，出門就加件褸，依家keep住寒冷，著少件打個乞嚏即刻流鼻涕嘅！出街識自己斟暖水啦，帶定條頸巾，hand cream呀潤唇膏果啲，完全係中女三寶fans，哈哈！

我好好彩，我哋個whatsapp中女group成員為數唔少，成班女人講東講西，由shopping扮靚買精華敷面膜，到湊仔經，到女士們生理轉變問題，大家都好踴躍幫手排解，確實係令我嘅中女階段過得好開心，又好安心。人大了，需要嘅朋友唔再只係同你花天酒地，夜夜笙歌，而係陪住你開開心心咁面對唔同階段嘅人。

好感激我身邊一班朋友，大家互相支持鼓勵，每次見到晴天彩虹emoji，我就覺得個世界好美麗，好有力量！

除咗中女group圍埋一齊嘅動力，響 facebook 亦見到愈來愈多人做運動。話晒大家朋友都三張幾，個個都希望 keep up 自己，青春啲望落後生啲，健康啲身體機能好啲。就算個樣唔算老，但真係唔同細個㗎，依家新陳代謝好慢，以前是但食少兩餐已經自動瘦，依家餓死都仲係成身肉，哈哈！只有不停運動，先可以促進新陳代謝，延緩衰老，我哋女人更加要啦！

朋友們個個星期行山，跑步，做 yoga，做健身，大家都好努力呀，形成咗一個運動風氣。加上好多朋友都有小朋友，可以帶埋小朋友做運動就更好了。最鍾意就係見到朋友運動後嘅成果，之前係兩個小朋友嘅肥師奶，依家修晒身，變返少女咁，仲操到有腹肌，我好羡慕呀，我鍾意肌肉呀！

結果佢就做咗我軍師，教我點樣食嘢點樣操肌，係佢令我好有恆心去跑步，唔得閒跑就睇 YouTube 做消脂運動，冇藉口懶惰，辛苦完又唔會亂食嘢浪費咗，係一舉兩得的。同埋原來 keep 一個恆常運動，成個人心態會唔同咗，充實又有動力，可能精神唔易累，連帶心境都後生埋。

只要搵到令自己快樂嘅根源，其實中女都可以做得舒服自在。啲小朋友開始長大，我哋開始多番少少自己時間，可以諗下自己鍾意啲咩，可以搵下有共同嗜好嘅朋友仔，建立番自己空間。媽媽們有自己嘅興趣或事業，其實對成個家庭嘅運作係件好事，太 focus 落一樣野，有時會失平衡。

而當你搵到做媽媽以外嘅存在感，自我價值被肯定，真係會覺得好滿足，同屋企人又多點話題，生命變得更精彩更有趣。