呔媽專欄｜夫妻不同性格教仔互補不足

兩個仔由細到大都跟我多，我係主要照顧者，身教咁多年，佢兩個某啲性格，講嘢語氣都似足我。而老公嘅角色就係同仔玩，提供娛樂。

不過近幾年我留意到，又幾欣賞嘅，係老公教仔都有一手，可能兩個都係仔啦，愈大愈黐爸爸，9歲10歲步入青少年期，同爸爸比較多共同話題。除咗玩樂之外，好多開始要明白同學習嘅人生哲理，社交問題等等，老公都好有心機同佢哋講，有時佢仲比我有耐性，講一大輪例子去分析畀佢兩個聽。

我同老公算係互補不足，我性格比較隨心隨意，凡事看開，冇咩所謂，所以我湊佢兩個係好開心好舒服的。我最怕就係一定要咁樣咁樣，我好驚呢啲壓力，唔好話湊仔，做人都係，太執著好辛苦。

或者係潛移默化，兩個仔性格唔難搞，一湊二冇難度。又可能我呢個榜樣太hea，連帶佢哋對好多事情嘅睇法都冇咩所謂，其實咁樣我又覺得唔係好事。始終仲細，未識分對唔同事要用唔同態度，啲嘢太唔著緊，太冇所謂，會令佢哋變得懶散，我覺得做男仔，行事態度要堅決啲，有原則啲！

呢個時候，我老公就真係幫到忙喇！佢執教比我嚴厲，就算好微細嘅品德問題，佢都會不斷重覆咁教，教到佢兩個習以為常咁做，其實我好感激佢。做人父母就知道，教仔真係付出好多心機同時間，亦唔係每個父母都咁勤力，願意為小朋友付山。

咪睇佢平時嘻嘻哈哈同啲仔玩到癲晒，大細路咁，其實對仔驚佢多過驚我，但有咩事又會成日幫住爸爸㗎喎！證明兩個係知道爸爸真心愛佢哋，嚴教同成日話住，都係想佢哋行出嚟堂堂正正，大大方方，做個好孩子。

教導小朋友嘅責任，好多人都會覺得係落在媽媽身上，而爸爸就多數係搵錢養家，或放工放假陪佢哋玩。但我覺得每個人都有性格缺點，好似我自己咁，太隨性對小朋友又未必係好事，唔鍾意競爭又不夠進取。

自己一個人教嘅方式未必咁全面，可能有好多嘢都忽略咗，但如果連爸爸都可以一齊教小朋友，陪佢哋成長，相信屋企會更加融洽，小朋友成長得更好更健康。