呔媽專欄｜感激10年來共同成長的你

從10年前網上寫月blog，到依家facebook page分享生活，確實充實咗我咁多年來湊仔生涯。作為元祖blogger，我好感激我有好多睇足10年嘅朋友，由我結婚到兩個仔都9歲10歲喇。

呢班朋友可以話係同我一齊湊大佢哋，咁多年佢哋發生過嘅事，第一次食糊仔，第一次叫mama，第一次企/行，陪過我好多痛苦作戰，我全部都有擺響心，覺得好幸福，同大家呢種緣份，係我嘅福氣。

咁多年來，可能大家都已經將我當成真朋友，個page經常會有私信，喺各人生活中遇到唔同問題，想搵我傾計，問我意見。早期嘅時候，唔知點解好多卜友搵我傾感情問題，當年仲係廿幾歲，係咪覺得我好大姐姐，可以打救下你哋呢班迷途小羔羊，哈哈！

然後中期後期啲，大家開始同我一齊步入30，就好多搵我傾關於結婚，婚後，湊BB嘅問題。佢哋覺得點解我面對咁多野，冇幫手全職湊兩個，但都可以咁輕鬆咁正面，好想知道我嘅睇法，幫佢哋衝破心理上嘅障礙。始終唔係人人天生湊仔婆，好多卜友一大肚已好擔心遲啲BB出世搞唔掂，我真係開解過無數咁多大肚婆同媽媽。我覺得大家其實都有能力，只係心靈上需要有人支持，幫你撇走啲負面情緒，咁啱呢個係我強項，我好樂意幫大家的。

人說物以類聚，我絕對同意。就等於呢10年來，我吸引到嘅朋友都係充滿幽默感，超爛笑，思想好正面的人。我幾敢肯定鍾意睇我嘅朋友，都係心哋善良的，踏實的一群。事實上我屋企亦真係冇咩值得炫耀嘅哋方，一屋凌亂，可能夠草根夠貼地，係大家鍾意我哋嘅原因吧！

記得幾年前約了shemom一個邀請我做guest writer嘅同事食飯見個面，佢都係我卜友，見了面大家傾計，佢同我講，我同page嘅我係一樣㗎！哈哈！我好奇，乜原來會唔一樣架咩?? 佢又話我會用心回覆卜友，係一件好大愛嘅事，因唔係個個人會花時間花心機去幫人，仲要係網上不認識的。

最後，佢同我講咗一樣幾令我感動嘅係，從我page反映出嚟嘅回應瀏覽數據得知，我嘅卜友係好supportive的，係真係keep住入嚟傾計留言，friend底果種。我好開心㗎！雖然人少少，但我好鍾意我哋一個小社群咁，大家互相支持，有事又齊心解決，好幸運呢10年大家相處融洽，好難得的！

響度借呢個機會，多謝大家厚愛，期待我哋下一個10年，同埋你哋成日講嘅要睇住呔仔細細拍拖結婚，哈哈！