呔媽專欄｜慶幸有條件畀小朋友hea放暑假

細個最愛放暑假，有成一個半月唔使早起，拿拿聲做晒啲暑期作業的話，仲可以無憂無慮咁狂hea狂玩。記得小學就互相去同學屋企玩啦，去泳池游水啦，中學更精彩，日日群住幾個好朋友，行街睇戲打牌去沙灘。

響我心目中，放暑假從來係放肆的，齋玩唔學嘢，因此依家自己做媽媽，我冇諗過暑假要安排課程比兩個仔讀，只會安排玩啲咩。見朋友堆中的媽媽，開始幫小朋友報名呢樣果樣，課堂填滿 8 星期暑假，我先發現其實自己兩個仔都真係幾幸福，暑假完全係玩玩玩！

當然，可以 hea 住放暑假嘅，都係幸運的一群。因為首先要有大人響屋企照顧，小朋友先可以唔需要被安排課程，否則星期一至五都係要朝 8 晚 6，就大人返工放工時間。有朋友同我講，千祈唔好話畀佢個女聽我哋放假去玩，佢唔知有放暑假呢回事，冇人睇佢，佢返兩個Summer Camp。咁其實換個角度嚟睇，得一個小朋友的話，有學返好過日日響屋企無聊喎，起碼有其他小朋友一齊玩，都開心呀！

我哋美國呢邊，Summer 嘅課程叫做 Summer Camp，意思唔係去路營，係一個夏季課程咁解。而 Summer Camp 其實都好多好有趣的，可以參加唔同機構主辦的，例如有泳會搞游水 camp，地區隊打籃球 camp，又有 Science Camp 研究科學，有Zoo Camp 去動物園做工等。小朋友上午做英文數學學科練習，下午就可做運動或戶外學習。每個 Camp 大約 4 星期，收費因課程而異，不過唔平，比較受歡迎的一星期大約要 300-400 美金，名額唔多，要一早排隊報名的。

之前都有聽過香港嘅朋友會比小朋友過嚟美國上Summer Camp，以我所知有啲 Camp係比海外小朋友都可以參加的。而唔同嘅大學，都會搞類似呢啲夏季課程，畀高中生可以有機會親身了解，體驗大學生活，去上堂學下唔同 major 嘅嘢，發掘下自己對邊方面有興趣，第時選科更得心應手。