呔媽專欄 #223｜生BB前請調整好自己的心態

作為一個寫作人，特別是講家庭仔女的，我覺得自己有責任去傳達正面訊息，提供對家庭和諧有好處嘅想法。無論係夫妻關係，定係對仔女教育，我希望睇完我文章嘅朋友，會有另一種領悟。

每次出文後，好開心收到你哋嘅留言同inbox，大家又討論一番，講下自己睇法，都係我鍾意寫嘢嘅動力。

夫妻相處，一段婚姻其實唔易維持得好，結婚始終唔同拍拖，婚後多咗好多事情要解決，要共同面對，好多嘢已經唔再係一個人嘅事，而係兩個人。簡單就如同居，拍拖時當然珍惜約會時間，但開始一齊生活，日對夜對，要適應大家唔同嘅生活習慣，已經未必忍受到。

朋友同居變分手

我有朋友係過唔到同居階段，嫌對方實在太難頂，唔好話要結婚對成世，最後分埋手。有時唔係話對方唔好，而係大家家庭背景，成長方式唔同，過咗盲目熱戀期，要相處耐咗先知啱唔啱對方的。因此我支持同居，仲要唔好掩飾自己呀，將最原本嘅一面展現出嚟，睇下大家接唔接受到對方，好過婚後先發覺磨合唔到。

搵到適合嘅結婚對象，兩人婚後生活得好開心，到有小朋友嘅時候，又係一個關係大考驗。有小朋友後，生活上的確好大轉變，至於係好係壞，其實完全在於兩公婆願唔願意為屋企付出同承擔，享唔享受湊小朋友嘅樂趣。

有時睇到網上文章，講一大堆有小朋友後的慘事，所有嘢以佢哋行先，食個飯都要諗佢哋啱唔啱食，自己沒了自由，不能再享受生活，帶小朋友去旅行又煩等等。睇到呢啲文章，我覺得幾可笑，但又幾無奈。

生BB前請調整心態

點解有人會認為有小朋友嘅生活，可以同拍拖一樣咁Free? 你唔預料要花心機時間照顧佢，難道BB一出世就識得照顧自己? 你未必要完全犧牲自己，但如果連遷就自己個小朋友都唔願意，為佢哋做多少少都覺得痛苦嘅話，我想講，其實做你個小朋友都好命苦。

我係一個全職媽媽，而自問我嘅性格係非常浪蕩，我仍然好隨性，但礙於我係媽媽呢個身份，好多時我會收埋內在嘅自己，平時要似番個媽咪，雖然都係唔太傳統。我正正就係以上所講，咩都以小朋友行先，唔要自由嘅媽媽，10年了，我好享受湊佢哋嘅每一刻。

我覺得一切都係心態吧！我都有自己想做嘅事，但小朋友大得太快，如果我一直只顧自己，唔花時間陪伴佢哋成長，錯過了，我會後悔的。而家佢哋大個晒，我又多了私人時間，我覺得好好呀，諗起每個回憶都好開心！

計劃有小朋友前，預先調整好做父母嘅心態，咁樣有小朋友後嘅生活一定會比以前更愉快，夫妻關係更親密呢！