呔媽專欄#220｜如何令孩子愛上閱讀？

屋企不是書香世代，就算讀大學時我主科都係修讀設計，老公又係手作人，總之我哋兩公婆都唔係讀書之人，一坐低唔郁動就會打喊露。好彩，我由細鍾意睇書，鍾意拿本書上手睇嘅感覺，以前睇潮流文學，愛情小說，到而家會睇啲畀到正能量，心態健康方面嘅書，我都有書癮，去台灣可以響誠品通宵打書釘。可能因為咁，我兩個仔由細都鍾意睇書，對於如何輕鬆地令小朋友愛上閱讀，我有少少見解，或者對大家有點幫助。

佢哋BB時已經好鍾意聽我講睡前小故事，一開始我都係自己作，作啲好無聊但結局好開心的，天馬行空嘅都有，其實就係亂吹。我覺得唔需要話講啲咩好有教育意義嘅故事，只要適合番佢哋年紀，聽完開開心心睡覺去就可以了，反而太多情節，令佢哋諗來諗去，對幼兒睡眠唔係咁好。呢個時候，係養成佢哋鍾意聽故事嘅習慣，想知主角們將會發生咩事，我覺得對佢哋求知欲會有提升。

到佢哋大少少，開始上幼稚園，我就開始拿書上手，講啲佢哋易明，又有少少教育義意嘅睡前小故事畀佢哋聽。書店/圖書館好多選擇，不妨拿來用，但我記得果時我會跳過一啲比較深，佢哋唔明白的情節，費事太用腦。我諗可能就響呢個時候開始，佢哋見媽咪拿住本書逐段篤住來讀，開始明白「閱讀」係咩一回事。

伸延到佢哋一直返學，都好鍾意睇書，好有興趣知道每個故事內容，又或者從書本中認識一啲佢哋未接觸過嘅事，覺得好amazing，會成日同我講啲我未聽過嘅嘢，我都覺得好利害！老套講句，書中真係有黃金屋㗎！

而另一樣，我認為非常重要嘅一環，係我哋外出時甚少畀佢哋以電子產品解悶。因為學校有Technology Day，佢哋平時在家亦會用電子產品，所以我哋唔批准外帶上街，希望放假有番正常family time，可以一家人傾下偈，而唔係各自低頭娛樂。兩個仔習慣外出時，自備玩具或者書本去消磨時間，因此佢哋好鍾意睇書，同埋兩個會分享自己睇緊啲咩，睇漫畫會一齊笑。

我覺得，要小朋友愛上閱讀，就要畀佢哋自由選擇自己有興趣嘅書。即使佢哋只鍾意睇無聊漫畫，其實一樣好，因為睇書係一個習慣，習慣後，佢哋大大下自然會對其他書種產生興趣。有時行書局見啲家長幫小朋友選購，呢本話唔好，果本話無聊，要佢哋睇啲有用有知識嘅書，其實咁會減弱咗佢哋對閱讀嘅興趣。講到尾，小朋友嘅興趣大多係睇我哋父母點引導，每個星期抽少少時間，同小朋友去圖書館睇書，係個唔錯嘅親子活動呢！