呔媽專欄#222｜到這世界邊端返學（美國篇）

同香港嘅朋友傾開小朋友讀書事情，大家好驚訝原來住美國都會擔心小朋友入學問題。當然，比起水深火熱嘅香港人，我哋情況尚好，始終三藩市係大城市，有唔同種族嘅人溝淡了發狂讀書瘋狂補習，誓要入名校嘅一群。

對我嚟講，如果大家有睇開我寫嘢，可能會知道我最怕呢啲。盡可能我想兩個仔快樂學習，而唔係返學激鬥，始終朋輩影響好大，小朋友太有鬥心我會好驚。

私立學校 vs 公立學校

既然大家有興趣我呢邊小朋友讀書情況，不妨又同大家講下。我哋呢邊讀書，有分私立學校同公立學校，私立當然就係畀錢讀書，呢邊私立就有如香港學校一樣，鬥爭好大，功課好多，而呢類私校當中佔 8 成學生係亞洲人。

聽過有學校會為保自己校譽級數，勸籲追唔上嘅同學退學，實在係冇人性嘅，不過又咁講，入得去嘅都係一班望子成龍嘅家長，都會係咁 push小朋友成為尖子，如果小朋友真係跟唔上，冇呢個鬥心嘅話，轉番出去都唔係壞事，但咁細個就要承受被淘汰嘅感覺，真係要求心理陰影面積喇。

到講下我最愛嘅公校，點解最愛呢？一來老公份糧打咁重稅，扣 30% 糧，梗係要善用番政府資源，小朋友13年(Kindergarten - Grade 12)免費教育。二來公校嘅和平共融，老師們有教無類，唔只關心學生學業上進展，同時亦好緊張小朋友品行，呢個係我最感激同欣賞的。

讀公校嚟講，大多數分住區，就如香港，好多人會因為校區好，而搬去該區居住，100% 能夠直入該學校。講到公校咁好，聰明嘅你哋，當然諗到又有一大群唔想比私校錢，但又想入好學校嘅亞洲人進駐啦！

冇錯喇，久而久之，某幾區本身多白人嘅好校區，又畀班有錢亞洲人高價買屋搬入，慢慢又成為另一個 Chinatown，然後你會見到當地愈來愈多補習社，愈來愈多珍珠奶茶！

補習令老師反感

有時都幾無奈，美國又不是香港，唔明啲人點解要將香港果套帶來呢邊！好多外國人一聽到亞洲小朋友放學放假就去學呢樣果樣，真係充滿問號，就連老師都唔鍾意小朋友補習的，因為係群體學習，唔係單對單教學，如果小朋友一早就識晒啲嘢就好難投入聽課，上堂氣氛會差咗 ，對學習冇好處。

其實大家按步就班，小朋友輕鬆學習，一樣可以取得好成績，將來一樣可以做自己喜愛嘅工作。我都明白，香港大部份家長是為勢所迫，有得揀就係人都想開心舒服，有邊個想為功課考試日日鬧細路？

唯有改變下自己心態，教功課時保持冷靜，放假多點帶小朋友往外走，盡量平衡番平日的忙碌吧！大家加油呀！！