呔媽專欄#224｜Weak7夫人解答網友疑難

我好鍾意同網友們傾計，其中一個原因係我鍾意聽下其他人對唔同事物嘅諗法，我覺得好有趣。同樣地，我諗網友們鍾意搵我傾計，大家相知不相見，可以無顧慮地暢所欲言，加上我性格比較自我，又怕煩，因此我嘅解決方法都係直截了當，可以幫到大家跳過唔少自尋嘅煩腦。

網友不用太在意別人想法

近排睇到朋友一段Facebook感言，我覺得要分享，特別送畀「成日好怕其他人唔知點睇自己」嘅朋友們。聽聽埋埋咁多大家嘅苦況，我發現大部份解決唔到嘅問題，唔係來自自己，而係來自他人嘅目光，他人嘅言論。大家常掛口中嘅「好怕畀人咁講，好怕佢咁樣諗我，好驚我咁做之後佢會畀說話我聽...」其實真係好無謂，點解別人一個想法，一句說話就可以對你有咁大影響？

加上果個「別人」好可能只係我哋人生中一個過客，佢話完你，轉頭走了，咁我地為佢而做錯嘅決定，又有邊個可憐呢？一個人嘅生命，應該係為咗自己快樂而活，響冇影響其他人嘅情況下，人地點睇，who cares？

朋友感言大約意思係：以前覺得「唔好介意其他人點睇自己」呢句說話太過自我保護，咁樣好難檢討自己，又話覺得就算點口硬都好，始終多少都會介意別人嘅睇法。但隨年成熟，愈了解其他人嘅所謂嘅「睇法」，原來多數係好片面同好主觀嘅時候，你就會發現其實真係唔需要太介意人哋點睇自己。

兒子似自己光明磊落

睇完佢寫呢段嘢，我幾慶幸自己係個唔多理人講咩嘅人，凡事隨心而行。我覺得咁樣好好，可以做自己想做嘅事，可以用自己最舒服嘅方式生活，呢個相信係人生最基本的吧！以自己呢種性格教仔，有個好處，佢地做事唔會婆婆媽媽，夠爽快。好似兩個仔返學，大仔同我講老師誤會了佢睇咗隔離同學答案，話咗佢兩句，佢同老師講佢冇睇，老師唔信。大仔冇嘢喎，佢輕輕帶過，佢話其實老師信唔信佢都唔係好care！自己冇做就得啦！

此事，可能你哋會有唔同睇法同意見，等於有啲人佢地對好多事情會好執着，畀人誤會會發癲，會好唔開心，好介意別人對自己嘅睇法。在我嚟講，我都會在乎別人對我嘅評價，但只限於對我好重要嘅人。你冇可能要全世界鍾意你，了解你，對於別人嘅支持，我只需要我緊張嘅人支持自己就夠了。我同大仔講，老師信唔信你其實冇所謂，因為你唔會因為佢信，或者唔信，而你變成佢心目中偷睇嘅人，係咪？

你本身正直嘅話，佢點諗你，你都係好人，時間會證明一切，做好自己就可以了。最重要嘅係，我同爸爸都相信你。

10歲小朋友識咁諗，我好安慰了。聽過太多被別人左右嘅人生，自己諗唔通，為別人而活其實好痛苦。希望有事情煩腦緊嘅朋友，睇完呢段文字，可以真真正正為自己嘅人生做個決定，唔好錯過咗先後悔，唔好委屈自己，大家加油！！