呔媽專欄#227｜給孩子一個學習自理的機會

如果你問我，美國同香港響教育上最大嘅分別，我會覺得係放手畀小朋友學習自理。而小朋友呢方面嘅成長又會伸延到， 佢哋長大後能否獨立自我照顧嘅問題。我見到最大不同嘅係，唔只個人家庭教育，係成個社會對教育小朋友嘅觀念都有唔同睇法。

就講一些我見過聽過嘅例子，好似我哋響美國生活，出街見到小朋友好多時衣著會係比較凌亂一啲，可能著了鴛鴦襪呀，可能外套扣錯鈕，但我哋嘅想法會係，個小朋友都幾叻喎，出門口自己著衫著襪，唔需要父母打點。特別是見到啲哥哥姐姐識自理，有個BB細佬妹的，更會會心微笑，覺得小朋友就係應該咁樣長大吧！父母唔應該將所有注意力集中在一個小朋友身上，靠自己就算扣錯鈕又如何？粒鈕係佢自己扣嘅，已經型咗啦！

扣錯鈕、著錯襪，又如何？

但我響香港見過有類似呢個情況發生時，我聽到人哋會講一句：「搞咩呀？個仔扣錯晒鈕嘅？你點做人阿媽㗎？」雖然可能只係一個玩笑，但我覺得個嚴重性都幾大。試想想個小朋友聽到人哋咁樣講，會點諗？有幾多個小朋友會覺得係自己問題？冇做番自己嘅事，即使媽咪幫手了，自己都有責任去檢查一次。加上其他大人都咁講，聽落就只會覺得係媽咪唔啱，冇好好照顧自己。

而另一個幾大嘅問題，係香港家庭大部份會請工人姐姐照顧小朋友，而美國呢邊可以話完全冇呢支歌仔唱。結果當然是，香港小朋友嘅起居飲食，甚至沖涼刷牙呢啲最基本自理，皆理所當然地由工人姐姐照顧，有咩錯漏仲會怪責工人添！

七年前「好爽」經歷記憶猶新

好記得兩個仔仲細，大約 2、3 歲吧，我一個人帶佢哋返香港玩，當時都未入幼稚園。去到一個朋友家晚飯，慣常我照顧小朋友先吃，點知飯一盛出來，工人姐姐就已經半搶我飯碗，自動追着餵我兩個仔，係！係兩個仔一邊玩玩具，姐姐一邊追住餵！嚇到我有啲呆咗，朋友就話唔使理佢哋啦，我哋自己快啲食完，爭取時間開檯打牌。

果次係我第一次覺得，原來有工人姐姐真係咁爽㗎喎！但同時我亦慶幸兩個仔係我自己一手一腳湊，否則真係幾大鑊。人一定有惰性，擺個人響身邊咁樣幫自己湊仔，唔好話小朋友，我諗連我自己都好快失去自理能力，哈哈！