呔媽專欄#230｜點解要10歲仔仔咁早箍牙？

大仔10歲，啱啱開始箍牙。好多朋友話唔需要咁早箍，可以等佢換晒恆齒先開始，咁樣或者唔需要箍咁耐。不過大仔情況唔同，照X-Ray後，發現係佢顎骨性哨牙，係成個上顎骨推前了，所以合顎時，正常人應該上門牙掂住下門牙啲，但佢兩顎之間就有段距離，因此望落會好似哨牙咁。而醫生有提及，男仔大約13歲啲牙骨就會生定晒，如果唔趁呢幾年矯正，大個咗想改就比較難，或需做手術。聽過兩個專業醫生意見，就決定畀大仔開始箍牙，主要係將上顎箍番後一點，下顎又推番前一點，同埋矯正番啲唔夠位出，又或出歪咗嘅恆齒。

聽完網友們嘅留言，我哋一直都好擔心大仔箍牙後會好痛，食嘢會好唔習慣。點知箍牙過程不單止唔痛，就連箍完牙後一樣冇點痛過，一樣食得睡得。除咗醫生叫唔好食硬嘢之外，其他飲食就完全同平時一樣，牛排都照食，毋需要食軟稔嘢。最大轉變係每次用餐後都要撩牙，同埋狂飲水漱口。夜晚用開牙線棒，依家就要用牙縫棒避過啲鐵箍逐隻牙撩，要好小心唔好有食物塞住響啲牙箍中間，同埋分外注意清潔，因為好多人都話容易爛牙。之前好多人推介水牙線，係電動式用勁強水力去沖走牙縫污物，但因為每次用時會搞到成身濕，只能沖涼時用，所以我說揀了傳統牙縫棒，大仔自己比較易用方便。

醫生話約三個月後，當大仔適應咗箍牙，就開始每晚戴Head Gear睡覺，嚿嘢係要嚟拉後上顎，慢慢矯正番顎骨位，可能到時先痛都未定，我哋都未知。暫時醫生話箍牙過程需時18個月，到時睇下箍成點，再決定需唔需要繼續。我就覺得如果認為小朋友需要箍牙，聽多幾個醫生意見比較好，如果多過一個醫生都建議要箍牙，先考慮有此需要。