呔媽專欄#238｜天生我才必有用

「天生我才必有用」一句非常老套嘅鼓勵說話，但如果你活到一個年紀，經歷過好多得失後，你會好清楚一個人必定會有佢自己嘅才華，只係有時懷才不遇，就要靠運氣搭夠。我唔相信一個人可以只靠運氣成功，機會永遠係留畀有準備、又有才能嘅人。講啲咁歷練嘅嘢，又關教小朋友咩事呢？唔係呀，我真係教教下兩個仔，呢啲人生道理就出嚟喇！

從前兩個仔做咩都拍住上，有學一齊返，有運動一齊玩！同一條路行行下，兩個人梗有一個跑出嘅，果個係細佬。你話佢係學嘢快啲又好，話佢醒目啲又好，總之佢好似做咩都叻過阿哥咁，自自然，老公就覺得點解細佬做到嘅嘢，阿哥會做唔到㗎？兩個仔真係唔同性格，係可以完全相反㗎喎！阿哥鍾意玩自閉，唔鍾意同人交手，做咩都慢調斯理、粗心大意，但非常誠實，好有愛心。

細佬外向，同邊個玩都得，有好勝心、做事快靚正、口硬心軟，但非常細心，好錫身邊人。同好多有兩個小朋友嘅家庭一樣，阿哥永遠係打到埋嚟仲戇居居企響度硬食，有時仲會駁多兩句嘴，誓將自己推向崖邊。而細佬呢？我哋都未開聲咋，feel到個氣場唔對路，已經快快手做好晒自己啲嘢，等唔使鬧埋佢，再唔係一早已經閃咗，仲響度等你咩！

好似上年阿哥打籃球咁，老公次次同佢練波，佢死死下咁款，激到老公心臟病發咁滯，反而細佬好有興趣同爸爸練波。老公見到咁，梗係失望啦！而此事對我嚟講，我睇到另一樣嘢，係如果你志不在此，就算畀你夾硬做到要求，你都唔會有果種滿足感。就好似我咁討厭煮飯，冇錯係煮咗咁多年，養大咗兩個仔，但你問我有冇一餐有滿足感係開心㗎呢？真係冇。呢個對我嚟講只係一個家務其一，你唔會洗完啲碗覺得洗得好好，唔會摺完堆衫覺得好整齊就有滿足感吧，對我嚟講冇話好唔好食，食得飽夠營養就OK。

然後有次我哋約咗去朋友屋企游水，但愈夜愈凍，個個都怕凍唔落水，淨係得大仔二話不說跳落水。果刻我明白，你真係鍾意一樣嘢，係冇人阻到你，我感動㗎！今年我冇再叫佢join學校籃球隊，安排番佢繼續游水，佢不知幾鍾意，幾自在。今日佢游水落堂，拿住張report card笑晒口同我哋講，老師話佢可以升級了，比預期快好多，再升兩級就可以代表我哋住區出去比賽。而今年可以參加籃球校隊嘅細佬，就好enjoy每一場比賽，打得好開心，好投入。

呢個經歷令我諗番起之前我寫過一篇文章 >> 公平考試真的公平？(回看文章)  你用同一樣嘢，科目又好、運動又好，去評價唔同嘅小朋友，係完全唔公平。情形就等於你叫金魚去同馬騮鬥爬樹，叫白兔同雀仔鬥高飛一樣，其實冇咩意思。每個人都有自己叻嘅嘢，有自己嘅才華，小朋友就係應該嘗試唔同嘅事物，試過做過，先搵到自己嘅天份。你話大仔冇運動細胞嗎？原來佢入水能游。如果之前見佢冇心機打波就放棄佢，話佢冇用，對佢失望，你估佢仲有信心做第二樣運動嗎？

做父母，就係要幫手發掘小朋友嘅小宇宙，呢樣唔得就下一樣，唔好輕言打擊，唔好對佢哋放負。天生我才必有用，大概就係呢個意思吧！