呔媽專欄 #252｜睇新聞也是教仔時機

相信近日大家都睇好多新聞，響屋企討論嘅時候，唔多唔少我哋嘅小朋友都會聽到，會問我哋點解咁樣，會想知道個社會發生緊咩事。其實就算佢哋唔問，我哋平時都會抓緊機會，同兩個仔討論新聞，我覺得話畀佢哋知個社會發生緊咩事，係好重要！！

我哋平時多數同佢哋討論罪案，藉此教佢哋如何避開陷阱，又如果不幸遇到同類事件，應該點樣反應。其實講得多係好，因為佢哋心底會對壞事有個警惕，會容易知道對方來意不善。要畀佢哋知道呢個世界真係咩事都會發生，壞人做壞事，可以完全冇原因，所以唔好咁易相信人，有懷疑一定要同屋企人商量，唔好自己亂決定。

美國好大，唔同香港，呢邊50個州，唔需要出境，佢一架車擄走咗你，可以呢世都搵唔到。美國有極多失蹤人口，唔講得笑！前排有個新聞，人家門前CCTV影到，一個讀初中女孩，放學自己返緊屋企嘅時候，佢發現有架車跟住佢同行，司機係中年漢子。佢好醒目咁專登向後快行，點知個司機真係跟住佢back up，佢驚起上嚟，又跑番前，個司機又向番前行，佢就知道自己成為目標。於是佢好醒目，向後跑，搵到泊響路邊嘅車遮住自己，然後趁司機唔覺，瘋狂逃跑咗。

呢個新聞我教對仔，時刻都要留意住身邊有無可疑人物，特別是一個人嘅時候，一定要經常望前望後。而最最最重要嘅，係千祈唔好一路行一路篤電話，同埋一定唔可以戴headphone聽歌！壞人最鍾意跟呢啲細路，因佢哋完全無戒心，聽歌更係與世隔絕，人哋從後一條毛巾蓋住你口鼻，整暈你就已經可以擄走你。當然都有同佢哋講，畀人捉咗之後會發生咩恐怖事，等佢哋認真提高警覺。

而另一個新聞，係關於網上罪案，我覺得必須同兩個仔討論，因為非常切身。佢哋開始大個，就快升中，更多機會接觸網上資訊，甚至會網上交友，所以必須提醒佢哋有關於網上嘅罪案。話說有個大肚9個月嘅女人，佢響facebook一個群組，見到有人免費捐贈BB物品，佢有興趣想要，結果佢去咗對方屋企拿取。佢入屋後，遭兇手切腹將BB拿出，被殺害了。

啲仔聽到好愕然，大家互不相識，點解對方要咁做？我同佢哋講，呢個世界好多人心理變態，變態嘅人可以因任何原因去害人去殺人。可能係童年陰影，畀一個大肚婆笑過，又可能係自己個BB小產咗，所以佢好憎有BB嘅人，你唔會知佢因為咩事要殺一個唔識嘅人，但佢真係會咁做。所以要記住，唔可以單獨去陌生人屋企，有需要交收，一定係去多人嘅哋方見面。如果對方話唔方便出外，多多藉口呃你去佢度，就知道一定有古怪！一定要拒絕，唔使怕唔好意思。

小朋友開始長大，我哋要教育嘅事又多幾樣。我開始明白點解我細個時，我媽咪咁鍾意同我講新聞，特別是非禮呀，強姦果啲，又唔畀我出夜街，果時最夜6點半新聞報導前要返到屋企。有女更加特別驚，特別擔心，做人父母真係長憂九十九。我媽頭先又打嚟，叫我記得要過濾咗啲水先好飲，加州水質差飲壞人。其實提咗成年架喇佢，仲講緊，你話做父母幾憂心呢..