- motherhood
- by 呔媽Kelly
- 07/02/2020
啱啱呢個星期，大仔去咗校區舉辦嘅 Outdoor Education，去 5 日 4 夜，類似我哋細個小六畢業營咁，美國呢邊小五就小學畢業。校區舉辦，大仔學校有參與，所以呢 5 日會有埋其他學校嘅 5 年級小朋友參加，除咗同自己同學玩，仲會認識新朋友。佢仲未返嚟，但聽講會係戶外野生學習，會帶佢哋成班上山下海，認識保育生態環境，另外就係學習獨立，起身要摺被鋪，會幫忙分餐，清潔等工作，玩之餘有嘢學，應該幾唔錯！聽上年有仔女參加完嘅家長講，啲細路玩到唔捨得返屋企，勁開心，希望年年有得去。
大仔係個比較多顧慮嘅人，佢一開始唔係咁想參加，因為驚呢驚路，但我同老公就同佢講，我哋細個畢業都會去呢個營，係人生中非常好嘅體驗，到而家我都記得，小六的我第一次離家嘅感覺，哈哈！好多好開心嘅事，百厭事，我哋推個男同學入女廁，然後告發佢！而家諗番係好好笑，當然個同學好慘啦，所以我冇同大仔講呢件事。然後我哋成班女仔傾偈傾到好夜，第朝上早會全部恰眼瞓，畀老師訓話，哈哈！仲有大棚食飯，啲飯菜都未擺好，成班同學已經係咁搶，一秒清枱，又係笑爆咀！呢啲回憶，而家諗起好珍貴..
星期一出門送大仔果個朝早，好多父母送細路，大家心情好興奮！特別是外國家長覺得甩難，喂放 5 日假唔使湊小朋友呀！Plan 定同老公老婆去 movie night，同朋友聚會等。當大家你一句我一句之際，我見到隔離個中國媽媽，非常不安。我同佢平時都有兩句，見佢咁樣，我盡量用我啲勁爛國語嚟安慰佢，叫佢唔使太擔心，阿仔大個仔喇，11 歲喇，係是候畀佢獨立下，放鬆啲啦！佢一路擔心個仔搬行李唔夠力，會唔見咗個睡袋，會唔會唔夠衫著，猛叫佢著埋件背心(在場得佢阿仔著到成隻粽咁)，又猛咁響老師同班同學 brief 緊果時叫佢阿仔呢樣果樣，畀我㩒住佢，冷靜啲呀唉！
隔離外國媽媽見到佢咁樣，都有啲無奈苦笑，真嘅！中國家庭係真係非常過火地保護小朋友，努力令佢地變廢柴，自理能力甚差。5 年級個個細路都咁高咁大，做咩事要搞到阿仔好似 BB 咁? 佢阿仔已經極力迴避，唔多回應佢，大個仔又咁多同學響度，開始識要面㗎喇，唔好咁樣搞佢啦！之後中國媽媽突然話要趕返工，托我照顧好佢個仔，我梗係話 OK，叫佢快啲返工啦！臨走仲千叮萬囑叫我幫佢阿仔拿行李，唉，可唔可以唔好咁變態呀！佢地就快高過我喇，佢地幫我就差唔多！當然我冇理佢個仔啦，我連自己個仔都叫佢顧番自己啲嘢，畀多啲責任佢地啦！仲要係仔嚟，唔訓練佢哋承擔多啲嘢，第時點擔起頭家，照顧老婆仔女呀！愛錫佢哋，唔係咩都幫佢哋做晒安排晒，真係要放手畀佢地出去闖，撞下板先會成長㗎！
呔媽 facebook page: 騎呢.weak7.卜車呔
