呔媽專欄#268丨守望相助分享愛

前排某日總統日假期，老公要返工，我帶兩個仔出外食 lunch。到達餐廳，個停車場滿咗，而隔離銀行嘅停車場冇人泊，我都諗住泊去隔離，因為公眾假期銀行唔開，唔會阻到人，應該OK啦！就響我轉緊入去嘅時候，見到有架白色 TOYOTA 畀人拖緊車，我快快手是但泊個街位，即刻快步入餐廳問餐廳啲人，有冇人係白色 TOYOTA，有人拖緊車，好彩，廳餐啲人話唔係佢哋，我鬆一口氣。

坐低食嘢，兩個仔望住我，問我：媽咪呀，你覺唔覺得頭先咁樣問人好尷尬㗎？ 我話冇喎！我係幫緊人，唔係做壞事，點解會覺得尷尬？ 你諗下如果架車真係餐廳入面嘅食客，佢可以趕得及出去開走架車，唔會一陣行出去發現畀人拖咗，要打電話畀朋友求救，拖車費幾百蚊，拖車場再收你停車費又幾百，唔少錢㗎畀人拖一拖。而家我問一句咋喎！可以幫到人，有咩咁驚？ 調轉如果畀人拖果個係我，佢咁樣救番我，我會好感激佢添呀！

個仔問完，我突然覺得我呢個行為好港式，就好似我哋有時響餐廳食嘢，老細發現出面有人抄牌，會大大聲同啲食客講，喂抄緊牌呀！有冇人要郁車呀，入錶呀？ 哈哈！可能真係由細聽慣，培養咗呢種互相守望嘅精神，講多一句幫下人，我覺得呢種熱心係需要的。就好似我哋平時見到人哋啲背包冇拉拉鏈呀，鞋帶甩咗呀，個電話攝後袋就嚟跌呀，全部係你講多一句就可以幫到人，何樂而不為呢？

然後又某個星期六，又係一拖二去食 lunch，又係停車場。當我到達時，見到有個靚位，個女人啱啱走緊，我打燈等佢個位嘅時候，佢落車走過嚟，畀咗佢張泊車飛我，同我講話仲有一個半鐘，佢入多咗錢。我話我畀番泊車錢佢，佢好客氣話唔需要，咁我非常多謝佢啦！然後啲仔話，今日真係好 lucky 呀！又唔使等位，又唔使畀錢泊車！我話係呀，個姨姨好有心，好好人，你諗下其實佢唔畀張飛我哋，對佢冇損失，但點解佢要專登落車送張飛畀我哋呢？ 因為佢對人好，想人哋開心。就好似我同爸爸平時成日教你哋，多啲去幫助身邊嘅人，你有咁嘅愛心，有對人哋好，想人開心嘅心態，你哋自然會成日做好事。

其實分享愛，對成個社會係好重要，會令人感覺變得 positive，正能量。而呢種感覺係真係會傳播，你踏出一步，做多啲去幫人，別人見到，感受過呢種快樂，同樣下次又會一樣咁做。我哋成日聽到人哋話，我細個因為消防員救過我，所以我第時大個都想做消防員去救人，又或者我經歷過啲咩，我又會想變成點樣。我覺得，如果大家生活中好多好事發生，自然會做多啲好事去令個世界變得更好，更有愛！下次，不妨試下踏多一步，講多一句，幫到人又身教小朋友，自己都會好開心㗎！

呔媽 facebook page: 騎呢.weak7.卜車呔