呔媽專欄#275｜少年時代的難忘二三事

抗疫期間，因為只有老公要一早返工，為免晨早被鬧鐘嘈醒，我又返去同仔一齊同房睡覺嘅日子。呢段時間，我哋三母子關係又親密了，而且非常開心，因為每晚臨睡前都會傾足一小時，直到老公嗌入房：好夜喇，你哋快點睡啦！

佢哋大個仔，對我小時候嘅趣事好有興趣，由童年到青春少年時，特別是返學同同學啲搞笑嘢，佢哋聽到手舞足蹈。然後又不停討論佢哋自己響學校同同學發生嘅事，原來好多我都冇聽過，佢哋仲互爆學校嘅百厭事。當中關於我自己，有兩段童年回憶，同同學發生嘅事，我印象深刻，講畀兩個仔聽，估唔到佢哋又有自己見解。

兩個仔問我小學時有冇畀同學欺負，我印象中冇發生過，但有一次有同學問我借咗錢，幾蚊雞，問咗幾次都冇還，最後終於肯還，但佢專登還咗幾十個一毫子畀我！我同啲仔講佢咁樣好衰呀！算唔算畀人欺負？佢哋竟然異口同聲話唔算，仲話只要佢有還番錢畀我，就可以㗎喇，唔可以嬲佢。

我聽到佢哋咁講，我覺得佢哋好純真，佢哋仲未有呢啲欺負人哋嘅壞思想，仲係好天真好善良。然後我就跟住話，咁又係喎！可能呢啲係佢辛苦儲番嚟還畀我呢，咁我都唔應該嬲佢嘅！果一刻，我覺得我唔應該破壞佢哋對別人嘅善良同體諒，雖然我知道事實並唔係咁樣。

然後我又提到某一次，中學時有同學仔上咗嚟我屋企玩，不問自取了一件飾品，我問佢嘅時候，佢話係佢嘅，唔係響我屋企取。當然我知道係我㗎啦，但佢唔認我都冇辦法。記得當時我同媽咪講，佢就教我，可能佢好鍾意果樣嘢，但佢父母冇能力買畀佢，偷嘢當然係唔啱，但諗下佢背後原因，唔好令佢太難堪。可以同佢講，今次媽咪話當禮物送畀佢，叫佢下次如果有鍾意嘅嘢可以講，大家咁好朋友，生日或者節日時送畀佢，偷嘢始終係唔啱，咁樣得番嚟嘅都唔會開心啦！

唔知點解呢件事我好深刻，亦好多謝媽咪當時咁樣教導我，凡事去諗下別人嘅難處，唔好話一做錯事就要人永不翻身。好記得媽咪叮囑我，呢件事唔好同其他同學講，否則一傳十，十傳百，呢個同學仔會好難堪，每個人做錯事都有改過嘅機會，反而你教番好佢，會對佢日後有好影響，大家開開心心繼續做朋友。

兩個仔聽完，好似又明白咗啲嘢，會同我講，係呀可能你鬧佢，佢又唔認錯，又會繼續偷嘢。反而你教好佢，佢知道自己唔啱，同埋有嘢想要就會出聲問，唔會去偷，咁樣仲好啦！然後佢哋下一句就問：媽咪呀，咁我哋可唔可以買果部 Classic 灰機呀？有成 600 幾個 game 響入面㗎！哈哈！

呔媽 facebook page: 騎呢.weak7.卜車呔