呔媽專欄#276｜鼓勵總比責罵好

「鼓勵總比責罵好！」呢句說話係我 11 年湊仔路上經常提醒自己的。我諗人同人嘅相處，不論大人又好，小朋友又好，每個人都想得到正面鼓勵，即使做得唔夠好。有時我老公會覺得，明明啲仔做得唔好，明明唔聽話，點解仲要好聲好氣，仲要慢慢講。嗯，我又覺得，如果已經試過鬧，仲要係成日鬧，佢哋都冇改善，即係唔 work 啦，咁咪又試下用另一種方法去教，可能又 OK 呢！

先唔講我呢種教仔方法係咪真係 work，但最少平衡到自己情緒，唔易激動的話，起碼冇咁易衰老先！我有個想法，做父母一定要企響小朋友角度去睇，因為佢哋嘅能力冇我哋咁高，經驗冇我哋咁多，因此佢哋做出嚟嘅嘢，一定冇我哋咁好。我好怕聽到大人話小朋友，點解你咁都做唔到? 我心諗，你細個又好好咩？可能仲差過佢啦！而我嘅睇法係，只要你有盡過力做，做成點都係好！每個人嘅能力都唔同，唔好話小朋友，大人都唔係個個一樣叻，我會睇佢哋有冇出心幫手，有冇盡力，定亂咁做了事。

一直以來有好多網友覺得我脾氣好好，自己湊住兩個仔可以好少勞氣，其實並唔係我脾氣好，而係我用咗呢個方法，鼓勵總比責罵好！好似大仔咁，佢摺衫真係好hea，又唔反轉前後，有時又捲埋就算，但次次佢摺完，我都會讚佢摺得靚過上次，結果佢而家摺得好好喎！唔知關唔關我讚佢事，但我覺得佢花咗時間去做，得到媽媽讚佢有進步，下次幫手都幫得開心啲，順從啲嘅！如果幫完手仲要被嫌棄話摺得肉酸，換轉係我，下次都唔想做吧！

當大家去到某個教仔樽頸位，日日鬧都冇用，甚至愈鬧愈差，可以試下呢個教法，可能會有新進展的。同小朋友好好溝通，同佢哋講不如大家一齊做好啲，以後父母鬧少啲，小朋友又聽話啲，好好相處，屋企氣氛一定會變得更加好！

呔媽 facebook page: 騎呢.weak7.卜車呔