呔媽美國生活 呔仔上堂發夢老師叫佢戒食…

話咁快又開學喇！仍記得上年開學第一日，大仔竟然拎黃牌，意思係比老師warning，嚇到我心臟病咁滯。了解後，原來因為佢發白日夢，唔專心聽老師講嘢，所以被警告了。知道原因後都冇咁驚，因為我地每年暑假都返香港玩足 2 個月，唔好話小朋友要坐定定返學，大人亦好難立即收拾心情返工，或重回正常生活，呢樣我係好了解的。

多年來我響美國讀書時，放假返香港嘅時間係校到一放假當晚就走，臨開學前一晚先返嚟，時差都係返緊學先轉，頭一個星期絕對係返學校發夢。做人媽咪，不能太過份，所以我早 10 日返嚟等佢地應適，但返學發夢呢樣嘢，就好難避免了。

早餐戒食糖有因
好，今次就講下如何令小朋友專心啲，提高佢地專注力。有時同朋友提起，原來好多人都唔知，糖份係會令小朋友情緒高漲，不能專注。我見香港嘅小朋友真係食好多好多糖，飲好多甜嘢，唔知係咪因為咁，大家都非常 hyper，家長們一般好難控制場面。

因此上年老師見大仔上堂唔留心時，就提醒小朋友返學前，一定要戒糖，唔好食即食甜穀麥，最好食燕麥、雞蛋、果仁、生果等做早餐，小朋友吸收小麥同蛋白質係最好的，可加強精神同專注力。而白飯白麵包等，會轉化成糖份嘅食物，最好留返 Lunch 或放學先食，早餐盡量避免。

時間管理好處多
而另一樣可以提升小朋友專注力嘅方法，就係幫佢地訂立時間表。唔好睇少呢樣嘢，原來可以幫助小朋友專注外，亦可以增加佢地安全感。當佢地習慣左一個模式，知道自己嚟緊要做啲咩，佢地感覺會比較實在，同時亦能於一段時間內訓練專注力，情況就如返學讀書一樣，佢地知道每日呢個時間係學習時間。

我覺得對於佢地長大後，自己安排控制時間都有一定幫助，小時候嘅習慣，生活上嘅細節，其實可以影響深遠。

至於我兩個仔，放學後嘅時間表其實好簡單，而且慣常了，就會自動進行。3 點放學後嘅一小時可以休息及茶點，然後用一小時做功課及睇書做閱讀報告。到 5 點，我開始預備晚飯時，佢地可以玩，玩到開始晚餐，餐後預備返學嘅嘢，然後沖涼，上床睇陣書就睡覺了。

平日都係呢個時間表的，而放假就比較悠閒，冇 schedule 的，可以出街玩，出街食飯，放假就係輕鬆！大人小朋友都 relax 一下，先有氣力再挑戰下一個星期的忙碌吧！