呔媽養成高EQ 唔鬧仔 8 年進入收成期

朋友見到我湊仔，好多時會流露出驚嘆嘅表情，為嘅唔係我湊得好唔好，而係當佢哋見到一啲會令父母爆炸嘅事情，好出奇點解我可以咁平靜地面對。

我想講，其實我本身個人極唔冷靜，後生少少果時更加係超燥底，超冇耐性。未有小朋友之前嘅我，都真係冇諗過每日面對戰場般嘅環境，可以從容不迫，甚至將呢種「亂世」視作為比小朋友一個開心童年，我有時都真係服咗自己嘅！

唔怕屋企變亂局
可能自己都係個大細路，好多時佢地啲瘋狂玩法其實我 OK 的，甚至玩埋一份。我覺得就算幾凌亂，大家一齊善後就冇問題，仲可以藉此教佢哋自己執番自己手尾。

聽過幾個朋友講，千祈唔好買泥膠畀佢地，佢唔會畀小朋友響屋企玩，因為會搞到好污糟，有排執。總之所有嘢都最好唔好打搞到父母，但其實咁樣會令小朋友失去咗好多樂趣，同時大人嘅觀點亦會直接影響小朋友性格，佢地睇法會學咗大人，將好多原本想法有趣嘅事變得沒趣。

探究動機，不追究後果
在我而言，教仔重點就係教好佢地品格德行，當做錯事（依家7、8歲時）或搞到啲野一團糟（細個3、4歲時），我會睇佢哋做件事嘅出發點係咩，唔會「係又鬧唔係又鬧」，更加唔會發癲，因為除咗傷害同仔感情，自己又傷身之外，其實發癲係冇實際作用。

湊開仔嘅朋友，應該唔難睇出小朋友做事嘅出發點，即係你好多時會見到一啲小朋友係貪心嘅，黑心陰濕嘅，有惡意地做衰嘢搞人；定還是只係因為貪玩，冇惡意地搞亂檔，呢啲就要自己多留意，教法當然亦唔同。

我兩個仔可能在美國長大，性格單純，通常衰都係衰貪玩，唔用腦諗嘢。爸爸會反應大，驚啲仔蠢呀要學醒目，所以會轟炸。我就覺得好平常，直接教佢地下次應該點做，係有危險性嘅嘢先加強語氣，否則人誰無過呢，總唔會次次衰同一樣嘢嘅，畀佢地錯誤中學習都係好事。

自己唔癲，佢哋都會好平和
用呢套咁平靜嘅方式教咗 8 年仔，自己睇番，其實得到好多意想不到嘅好效果，小朋友會有樣學樣。例如，佢地甚少（我印象中好似冇）發癲，即使好細個時，佢地嘅表達方式都好平和，唔會周街扭計亂嗌，換個講法，佢地好 easy going，點都得嘅，唔會少少嘢就扭計，所以我一湊二都好易控制局面。

另外，佢地算幾聽話，通常講一句就會聽，我覺得係因為冇被發癲大鬧，大家建立左一個互相尊重既關係，我尊重佢地嘅同時，佢地亦尊重我，唔會要我猛咁講影響我情緒。良性循環地，佢地聽話我就更加唔需要大鬧，所以想小朋友好，首要係控制自己情緒，屋企氣氛融洽，必定會帶來好多好影響的。