回到 BB 糊仔時

點解會無啦啦講返 BB 野呢，因為近日有朋友問起關於 BB 幾時開始食糊仔呀，應該點樣開始，可以食D咩等等，令我諗返起初初佢地開始食米糊嘅時候，係有D野我有注意到嘅。而唔知係咪我嘅做法，影響到佢地由細到大都好鍾意食蔬菜生果呢? 所以當朋友問起時，我就諗住響呢度講下佢地 BB 時食糊仔呢樣野，同大家分享下我自己嘅做法喇。

記得當時佢地都係大約5個月左右開始食米糊，係 Gerber 牌子嘅米糊粉，用人奶或奶粉開都得。我一開始就開杰少少既，用匙羮易餵D，無咁易漏出黎。可能用奶開，甜甜地味，佢地都追住食。一日一餐先，適應左1、2星期無敏感，就可以加至一日兩餐。期間照樣飲咁多奶，無專登減，佢飽自然唔飲。

大約6個月左右，可以加菜蓉落米糊，逐樣加，睇下有無敏感。我果時鍾意買 Gerber 果D盒裝菜蓉就咁溝落去，太方便了~ 菜種類可以加紅蘿白、南瓜、西蘭花、蕃茄等，呢D佢地最鍾意！注意：我覺得唔好比生果住，等佢地習慣左食蔬菜嘅味道先！因太早食甜野，佢地就會抗拒食菜，始終甜野對小朋友黎講係吸引好多，但同時亦較易壞牙。唔需要太早比生果，蔬菜已足夠。

好喇大約7個月左右，我就開始煮綿粥爛飯，同時蔬菜亦變左新鮮蔬菜，亦可以開始加入蒸肉碎。因為細細有濕疹，我一直都係加雞肉同豬肉，好少食牛肉，食完佢會痕。做法其實好簡單，就係清蒸同剪碎！我蒸野都蒸左幾年，咩都無加，無油無鹽無糖，佢地食左3、4年呢D飯，已經習慣左。其實食物本身有唔同嘅味道，瓜菜蕃茄有汁，好開胃的，唔需要加調味。同埋 BB 味覺好敏感，食物本身嘅味道已好吸引，唔同我地大人要加味先覺得好食。日子耐左，我地又習慣左出街食飯前會餵左佢地先，所以佢地小時候反而唔太鍾意食街外野，太鹹。

其實開始食爛飯之後，一早一晚個時間都定左架喇，只係份量就隨住年齡增加，慢慢會加多一種菜，慢慢可以開始食生果，到1歲左右已可食白飯。

另外有少少補充嘅係，可以嘅話蒸得幾耐得幾耐，唔好嫌煩，因為身體健康係自己仔女。如果真係無時間，或者餐飯唔係你煮，咁唯有要求煮大人飯菜時盡量食清淡，少糖少鹽少油，對大人小朋友都好。而小朋友幼兒時已跟大人食，撈大人飯D菜汁，變左佢地食得好鹹，淡少少嘅就唔肯食，水又唔肯飲，太高鹽對佢地肝腎都有影響。同埋另一個壞處就係佢地會好抗拒食蔬菜，因為蔬菜本身好清淡，小朋友唔食菜缺乏纖維，亦會引起好多健康問題。因此父母係有個責任，即使幾忙，掏出15分鐘已可蒸一碟送菜比小朋友，為小朋友健康加油！