在地球的另一邊見識教書的最高境界!

兩個仔好適合美國呢邊既教育，因為老師們嚴格得黎，並唔會阻礙佢地天馬行空既思想。由於我做義工幫手預備功課等，會多機會見到佢地班上情況，好多無聊又有趣既事情，老師會鼓勵同學繼續，亦會搭咀，成班小朋友響度笑，好開心的學習生活。我諗，在我地大人黎講無聊既野，對小朋友而言其實並不無聊。如果你用心去聽，仲會回應的話，佢地會覺得受到尊重，同時亦會學識尊重別人。諗下如果小朋友覺得大人講既野無聊，佢地無興趣聽，係咪可以一句話：好沒趣，唔想再聽！ 就叫大人收聲呢?

而7歲8歲小朋友，就算滿口無聊，老師都會好專心聽每個學生講野，唔會聽漏的，仲會正面回應佢地，我見到老師咁用心對學生，實在感激，亦好欣賞！

而且老師唔會比較成績好或唔好， 又或者乖同百厭的既學生。我見有D平時好百厭，成日搞事既同學，老師一樣對佢地好友善，而我亦睇到長遠既效果，係正面而良好的。如果以我地細個響香港讀書，乖既同學一定得到老師歡心，而百厭的一般會被針對，至少唔會同乖的一樣對待吧！其實咁樣都係惡性循環，佢百厭佢壞，老師唔理佢，無人感化，佢愈覺自己被放棄，多數一直衰落去。香港風氣就係咁樣，唔會了解小朋友內心，只會好表面好膚淺的比較，演成教育歪風！而兩個仔既老師，真係做到有教無類，百厭的不會被忽視，人人平等，係教書既最高境界！

有時真係覺得老師好似父母咁，種幾多得幾多，用幾多心放落去比小朋友，係從小朋友反應睇得出。老師閒時愛同同學講笑，會講自己既野比班學生知，因為仔放學會話比我知老師隻小狗叫Gracy， 老師幾時結婚，又去過咩地方旅遊等等。而我見到堂上，每當老師一聲令下，大家即刻靜晒，專心讀書做堂課，就知道成班同學對老師既尊敬。由此體會到，其實做老師唔需要惡或要小朋友驚，反而付出時間同愛心，互相尊重，效果遠比小朋友因為驚被罰而聽話，來得更正面、更有益小朋友身心成長呢！