- motherhood
- by 呔媽Kelly
- 19/02/2016
近排睇左一短片，內容係有個小朋友響搭東鐵時不斷叫喊，喊足4個站，然後有個男人頂唔順，衝過去大力搖小朋友坐緊既BB車，喝佢收聲！先唔響度討論誰對誰錯，因我覺得教仔既野，每個人標準唔同，而別人對於小朋友發癲既容忍程度亦唔一樣，因此無謂深究對錯喇，反而藉此想講講關於車箱內大家應注意既公德心，因為近年真係少左好多…好多…
1)最基本，讓坐。讓坐比有需要既人，傷殘，大肚婆，老人家，揹住BB的父母，拿住好重野的人，基本上邊個比你更有需要坐，都應該讓比佢，對吧? 讀書時主動讓坐係正常不過，人人會做的事，唔需要政府出廣告，亦唔需要別人眼望望先唔好意思坐，但今時今日，見到好多年青人望到有需要都唔讓，扮瞓扮累埋頭打機篤電話，無錯係你坐先，法例無規定要讓，所以呢D叫做公德心同理心，有無就真係睇家教，睇修養了。
2)細聲D啦唔該！焗熱車箱中，有時人貼人咁滯，相信無人希望再被嘈音騷擾，但好多人講電話講到隔離車箱都聽到，全段對話有時仲夾雜粗口。其實無論講電話又好，打機又好，傾計又好，真係細聲D啦唔該！地方係公眾的，唔好當正自己屋企，顧下人地感受，唔好咁自私。同樣，其實唔止係車箱，於任何公眾地方嘈音騷擾都係非常乞人憎的。我所提及的短片爭執，都係因此而起，如果小朋友無法控制情緒，可以考慮落站等佢冷靜留再上車，真係趕時間唔想落車既話，可以試下轉移視線，抱佢出黎望下風景，起碼其他人見到你盡力安撫了，唔係齋坐由佢喊，相信亦唔會燥到要衝埋黎幫你教仔。又，前幾日去食飯，就有對父母由得個小朋友全程睇 iphone，壞眼唔關人事，但開到音量全餐廳聽到，睇到砰砰聲，個個都擰頭去望下邊檯人咁無品，但該父母竟唔覺有問題，比人眼望望都唔理架喎！呢D真係無公德心，小朋友唔見父母提醒亦唔知道係錯，所以家教真係好重要。
3)當車箱係遊樂場。見過唔少細路，一上車好似放監咁，跳呀衝呀企凳呀，影響他人之餘，又踩污糟晒D坐凳。點解我成日都話小朋友係無辜架呢? 因為真係D大人唔教先會咁樣癲法，所以你見到呢D小朋友既父母，係完全無視佢地仔女既行為，唔會出聲教佢地。有D甚至會覺得，小朋友就係咁架啦，就係咁活躍，你忍唔到係你無容忍量。咁就死啦，做人父母連責任都要推，自己都無公德心，又點有能力教小朋友做個有公德心既人呢~
