大富翁狂熱

遲仔一直都好鍾意玩大富翁。

之前有叔叔送左副幼兒版大富翁俾兩兄妹，遲仔已經好投入咁玩左一輪，玩得好開心。

最近有機會去表姐屋企食飯，發現表姐有一副「電子計錢器」版本0既大富翁，遲仔見到呢副大富翁，雙眼即時發晒光。每次去到表姐屋企，都心思思想我同遲媽陪佢玩。佢對呢副大富翁，簡直係愛不釋手。

其實，我都好鍾意陪佢玩嘅，可以一邊玩一邊傾計。父子之間有番多啲開心玩樂回憶，唔會只係得番啲「鬧」、「催」、「唔得」、「唔俾」。

仲有，宜家覺得更要陪多啲佢玩。因為在遊戲過程中，發覺遲仔其實都幾「輸唔起」。當要罰錢俾銀行、要賠錢俾對手、買唔到想要0既地、唔夠錢起屋、對手有機會賺錢...等情況下，遲仔都幾容易會唔開心、有時仲會發下脾氣...。

之前陪遲仔玩遊戲，有時會特登讓下佢，等佢贏，等佢開心下。

不過，再諗深一層，特登讓佢並唔係咁好，要俾佢輸下先得，從中學習接受同面對失敗。

一世人流流長，好似一出世就要同人競爭。小朋友自細就要同人競爭，面對輸羸；學習努力奮鬥去「羸」這種拼搏進取態度固然重然，但係學習面對「輸」同處理「輸」後的情緒，似乎係更加重要。

遲仔(同埋齊齊)，我地一齊學習呀！