小孩有責

呔仔細細開始大個喇，5歲6歲，開始要佢地對自己負責任，例如安排自己嘅時間。好似平時逢星期二，4點鐘上游水堂，車程只需20分鐘，佢地好鍾意臨尾果10分鐘響車訓著，然後一到泳池就好辛苦咁比我拍醒，又會扭計。見過佢地兩次咁樣，我就一早提醒佢地，上游水堂果日放學要響屋企訓定先，唔可以再咁樣響車訓幾分鐘，咁醒法會暈。佢地當然唔訓啦響屋企，咁佢地就要自己承受返個後果，比我拍醒後唔可以嘈唔可以扭計！老公話點解唔早一個鐘的佢地上車，由佢響車訓夠先游水，我又覺得，我已經提醒左要訓覺，而佢地亦知道訓幾分鐘醒嘅感覺係辛苦，既然佢地仍然選擇唔訓，咁都要負責返呢樣野。

另外一樣大家都會面對嘅，就係安排小朋友做功課嘅時間。呢樣我就捉得緊D，因為我要講解陪做(一齊承受後果)，所以即使係比佢地自己安排，都唔可以係最後一刻。細細同呔仔唔同性格，細細就鍾意一早做晒，可以玩。呔仔就鍾意玩完先做。每個星期五要交功課，我就提前星期三要佢地完成晒，做錯都有一日走盞嘛！試過星期三晚呔仔做到眼訓，我一定要佢做埋先可以訓。因為講好左係星期三要完成，即使唔係聽日交，都唔可以推去聽日再做，呢個係大家嘅承諾。我會教佢，如果真係眼訓嘅，點解唔下午又或者星期一，二做呢? 推到最後做，即使眼訓，都一定要完成先可以訓覺！呢個就係自己嘅安排，今次安排錯左，下次就要改善了。

我希望佢地識得安排自己嘅事，明白對自己做嘅決定要負責，要承受後果。呢樣我覺得對小朋友成長好重要，因為直接影響日後學習上，工作上，又或生活上嘅安排。有時我覺得自己對佢地有種執著，執著到有D變態，哈！好似呔仔細細食飯，我話左要自己食晒，如果我見到婆婆餵佢地，我會加返多一啖飯落佢地隻碗，因為講左係要自己食！餵一啖就加一啖，餵一碗就加一碗！呔細會話，係婆婆自己餵，但我話既然明知唔岩既事，點解唔拒絕? 唔拒絕，接受左就係佢地嘅問題，就要自己負責了！唔知佢地會唔會覺得比婆婆跣左呢？哈！