小小Handy Man

老公係個凡事落手落腳去做嘅人﹐上至拆牆補屋﹐鑽牆裝燈﹔下至砌櫃洗地氈﹗我真係好欣賞呢個人﹐我覺得超man呀﹗哈哈~ man在咩呢? 呢啲事表現到佢對家庭責任大﹐願意花心機時間去令屋企變好。而最重要嘅﹐大家都知道﹐比錢請人做自己可以印印腳咩都唔理﹐但佢永遠不辭勞苦﹐放工返黎仲走去整呢樣整果樣﹐覺得咁樣先係自己屋企。

初時我都有叫佢抖下啲野揾人整嘅﹐慢慢發覺其實呢個喺佢性格﹐咁我都唔阻佢發達喇﹐由佢鐘意點就點啦~ 呔仔細細大大下﹐可能睇得爸爸多﹐2個都好熱衷於修理呀﹐整野呀之類勞動工作﹐從此爸爸有咩project都有2個小幫手﹗

其實小朋友幫手執頭執尾又好﹐攪攪震又好﹐比佢地參與多啲﹐自然就會對件事產生興趣。我覺得唔好因為怕麻煩就唔比佢地接觸﹐只要講明一啲重要嘅規則﹐要佢地遵守﹐問題應該不大。順便可以教埋佢地響唔同嘅工作環境﹐點樣保護自己安全。

有大人做榜樣﹐慢慢佢地都會成為Handy Man﹐凡事親力親為﹐對屋企有承擔﹗

近日老公決定剷左前園塊草皮﹐之後舖磚。因為成日要剷草施肥實在難打理﹐最重要係想望落齊整啲。咁好玩嘅project﹐又點少得呔仔細細呢2個好幫手呢﹗

初初諗住比佢地攪攪震﹐點知2個真係落手落腳做呀﹗堅幫到手喎﹗

爸爸同呔仔剷起一舊舊草﹐細細負責搬去掉~

放小息﹐辛苦了~

跟爸爸去後園倒泥~

呔仔學識用腳踩深個剷黎掘﹗Good Job﹗

2兄弟通力合作~

爸爸揾左外援開Turbo, thanks文仔~

天光做到天黑﹐第2朝倒埋D泥﹐打平塊地﹐PART 1掂左﹗

P.S.香港既朋友仔未必成日有機會攪呢D大壇野﹐但都可以試下比小朋友參與一啲輕便嘅工作。例如IKEA嘅傢具﹐我自己都好鐘意砌﹐可以叫小朋友幫手hold住木板﹐又或者用6角匙扭下縲絲之類。幫到爸爸媽媽手﹐小朋友有成功感﹐自信增加﹐又可作為親子活動﹐一舉2得﹗^^