小朋友 不必迎合任何人

繼續講「 別漠視小孩情緒」這個議題。

世故的小孩例二，見到一個我本身都覺得佢性格好好，好細心又有愛心既小男孩，偶然一次無左父母響身邊，原來個陰暗面可以咁大！

事緣係有日佢媽媽有要事去辨，我同無媽媽響身邊的佢，相處左兩個鐘，D真實性格出晒黎，貪心，妒忌，霸王，又專登留難其他小朋友。可憐喇咁細個，父母攪到佢咁，完全覺得佢係為生活要假面做人，點解? 又係父母錫晒細果個，有咩事就搵佢出氣，明明細佬錯都只會鬧佢。望住佢，你會好理解點解佢變成咁，因為如果唔響父母面前扮乖，討好佢地，根本無人會望佢一眼，搏到一個讚賞。然後我諗返，佢平時D反應都有D古怪，好似第一個反應明明唔想讓人，但下一秒就會笑住比你，原來呢D唔係猶疑，而係經過長時間專人訓練既社交技巧，小朋友真係唔好隨便學！

例三，最簡單又普遍的，阿仔響父母面前話鐘意返補習，同佢傾多兩句，其實佢根本唔鐘意。但由於驚我地話比佢父母聽，佢轉頭又話鐘意。其實鐘唔鐘意，小朋友都應該表達出黎，唔好話怕大人鬧就唔講。係，其實好多時大人要你去補習，你鐘唔鐘意都要去，但咁樣唔代表你要話鐘意架，係可以講唔鐘意架！

我就係希望小朋友唔好收埋自己既感覺，咁細個根本唔需要為左迎合任何野而隱藏自己，咁樣係一個好錯既開始，而漸漸小朋友唔會再表露自己感覺，對正面成長會造成好大影響。長大後遇到問題都唔識同人分享，又或怕被鬧而自己諗方法隱瞞解決，年青人好多時就係咁樣出事。父母們，從今起多點注意仔女既情緒吧，多點鼓勵佢地講出感受，緊密溝通有助增進親子關係，父母了解支持及愛護，令仔女更有信心去活出快樂人生！