小雪人寂寞嗎?

我地住既地區算近Lake Tahoe滑雪區，車程大約3個鐘，所以每年冬天都可以帶呔仔細細去玩雪。記得3年前，即2013年2月，我地帶4歲呔仔同3歲細細去玩雪時，整左一個小雪人。天開始黑，呔仔由知道我地就快走時，一直顯得好唔開心，原來佢係好擔心我地要走了，小雪人會孤伶伶一個響雪山，會好寂寞了，又或者會比雪狼之類食左，好想帶埋佢走。唔想呔仔帶住不快心情返屋企，我就編左一個美麗既故事，同呔仔講，小雪人響我地走左之後，佢既爸爸媽媽同一班朋友仔會黎搵佢架，佢地會開Party唱歌跳舞，唔會孤獨的。夜D落雪時，小雪人仲會長高添！因為D雪會積高響佢頭上面嘛！如果我地帶走左佢，小雪人就會溶，就見唔到佢D朋友仔架喇~ 呔仔聽完小雪人既故事後，知道小雪人安好，佢就即刻開心返喇~

從來呔仔都係個好有愛心既小朋友，佢接受唔到見到慘事發生，會替人擔心，會感覺到別人既感受。當然我絕對應為係一件好事，佢有好多愛，可以令我地一家人同身邊既人快樂！但有時我會驚，佢既成長會遇到唔同既人同事，太善良會唔會被人蝦呢? 響呢3年裡面，我放心了，佢幾懂事，識保護自己的，特別是上小學了，同同學們相處都學到唔少生存技巧吧！哈哈！我原以為佢既善良會慢慢被現實同化了，但估唔到3年後，感性呔仔又出現！前日去玩雪時，佢知道就快要走，要離開雪人的一刻，又喊了，仲要係大大滴眼淚。(今次有D唔同，佢喱響我身邊好大聲表示:我無事呀無野呀！) 然後我地仍然同佢講返同一個故事，佢仍然相信雪人會有一班朋友仔接佢去玩，7歲了，我感激經過3年成長後，呢個小朋友仍然保持住一顆純真善良既心。