小 Project 大滿足

話說老公好鍾意將屋企 D 野拆爛重整，基本上搬屋咁耐就整咁耐，仲要一單未平一單又起。當然，我係好欣賞佢既，日日放工咁累都仲可以整幾個鐘，佢話想留返 weekend 陪我地家庭樂，平日做到就做喎。而佢鍾意做工程呢 D，就身教左比呔仔細細，2個仔細細個已成日跟住爸爸尾攪攪震。又2個男仔啦，好鍾意用工具，鑽呀鋤頭之類，覺得 man 卦？！而爸爸每次都會示範，教佢地點樣安全地使用。我覺得咁樣好好呀，因為呢 D 係訓練到佢地反應，同埋安全知識。

上星期行玩具店時，呔仔見到呢盒 Build a Bridge 嘅玩具好想買，我見都有意思既，同埋半價 haha，好啦就買比佢地睇下佢點攪法！估唔到佢地一拆盒，已經知道要將果包 cement 粉開成糊狀黎痴磚頭，仲識得分工，一個做起橋，一個攪 cement 等佢唔好結成一舊舊。之後就調轉角色，丫，兩隻野有板有眼喎！唔夠三幾下，條橋就開始成形了。

過程當中有件小事，令我好 surprised！條橋要先整左右兩邊底部，用兩邊迫住最後先搭到橋頂嘛。當呔仔整好一邊橋時，佢突然起身走左去搵野，我仲話佢攪咩呀專心 D 做！原來佢係要搵把間尺黎間住橋邊，咁拉到對面砌橋時咪會水平線打直唔會有偏差囉！Oh my god~!! 我完全無諗過佢識咁做！我都係靠自己肉眼幫佢度過去咋，果刻我覺得呢個仔好有 sense 呀，會好認真咁做好一件事，真係好驚喜！然後諗返，應該係爸爸成日用水平尺度野，所以呔仔就從中學識點樣去運用唔同嘅工具了。自己一手一腳完成呢個小工程，兩隻野非常滿足，仲即刻出動自己 D 工程車玩具上橋，黎個小地盤玩意添！