少囉唆‧多讚賞

最近，耐唔耐就會同遲仔開火嗌交...

無錯，係嗌交。

有時當提醒佢要專心做功課、做完野要有手尾執番好啲野...、要呢樣要個樣野時，佢就好容易發脾氣，會用啲無禮貌嘅態度來回應...。

當佢咁樣回應時，我就好容易扯火，會鬧佢，跟住佢會頂咀，你一言我一語咁嗌交。

遇到呢啲時間，真係會好嬲，心情久久未能平伏...。

後來經遲媽提醒：可能遲仔剛升小一，有好多野要適應，可能情緒反應會複雜啲...

係喎，點解我無考慮過呢一點呢？

當自己嘗試設身處地考慮遲仔嘅情況，真係容易啲理解到佢點解會咁樣，我都可以放低怒氣同唔開心嘅感覺。

作為爸爸嘅，係要去幫助佢，而唔係要嬲佢、要同佢死撐。

回想呢一排，真係不斷去催遲仔去做功課，想佢專心啲，想佢唔好浪費時間...。當遲仔好努力咁做完一樣功課，我就會即刻催佢做下一樣，我原來都幾似一道催命符...，原來好耐無讚過佢或關心過佢。

「發脾氣、無禮貌、唔專心做野...」，呢0的全部都要教，但係要視乎仔女的狀態，揀選適當時間用合適的方法去教。

諗通左，試下改變下：

1) 講番多0的讚賞同關心0既說話。

當佢做完一樣功課，讚下佢先：叻仔喎，好專心咁做完呢份功課，不如透一陣先再做啦。

2) 當遲仔發脾氣時...，提醒自己：我要幫佢，而唔係同佢硬拼嗌交...，先忍住自己的情緒。慢慢聽佢講，再慢慢同佢解釋。

當自己改變左，我同遲仔嗌交0既情況減少左好多啦，兩仔爺又可以再攬頭攬頸、有傾有講啦 🙂

(「關心、欣賞同鼓勵」係建立親子關係中重要0既元素！)