從旁協助

早幾日係遲仔學校旅行，好好彩抽中左做家長義工。有機會見下佢嘅同學同老師，同埋睇下遲仔喺學校裡面係一個點樣嘅人，了解一下佢係點樣同人相處。

遲仔喺學校係班長同組長，似乎都係一個幾守規則嘅小朋友。不過有時會過左龍，即使係去緊旅行，都仲經常提住同學唔好跑，當同學大聲講野時會｢殊｣同學，提佢地靜啲。

我見到有啲同學會「反擊」：｢殊殊殊，宜家去緊旅行呀，唔使殊啦...；宜家去緊旅行呀，點解唔可以跑呀？｣

見佢地你一言我一語咁樣，好似有0的火藥味。看在眼裡，我有0的著急。

唔想遲仔同同學嗌交同磨擦。心想，不如叫老師唔好俾遲仔做組長或班長之類嘅角色，等佢唔使執行任務，減少同同學間嘅磨擦啦。

不過，說時遲，那時快，呢幾個小朋友又玩到攬頭攬頸，都friend咁喎...。

諗諗下，小朋友之間有小朋友相處的模式，大人有時未必會明白。同埋，小朋友就係要透過與其他人相處和互動，從其他人嘅回應反應中，知道自己有乜啱有乜錯，咁樣先有機會學習同改正。若果作為父母嘅幫佢清除晒成長道路上嘅路障，讓佢一帆風順，佢就無機會學習，反而係害左佢。

今次有機會做家長義工，觀察到遲仔同人相處時遇到嘅問題同困難，我就有機會按佢嘅不足，再從旁協助佢跨越障礙，克服困難。

按觀察，遲仔要多有啲幽默感，放鬆啲；處事唔好咁固執，要有多啲彈性；要幫助遲仔學習抒發情緒，唔好谷住谷住。

不過，呢幾樣野，遲爸遲媽窮一生都未必學到識，希望可以同遲仔一齊好好學習！

(遲仔，有一班友伴陪伴你成長。過程中總有開心或失意時，願你在過程中好好學習，爸爸會盡力在旁邊協助、支持同鼓勵！)