- motherhood
- by shemom
- 19/12/2013
文/ Sally C
童星出身的唐寧，有一對水汪汪的腰果眼，清純可愛形象深入民心。她雖擁有童顏樣子，但內心卻比同齡的人成熟，30 歲前便完成了人生最重要的三部曲：事業、結婚、生育孩子。今時今日，她才剛30 出頭，童顏依舊，爽直依然，但卻多了一份成熟的韻味，相信這全因生命裏，多了兒子「俊俊」。
屋企多了一個人
唐寧與兒子俊俊
唐寧家裡一直有養狗，現在有三隻。不用上班時，她會在家照顧寵物。對於喜歡家庭生活的她而言，即使經歷生育大事，依然說影響不大，還笑著說：「我自己唔係覺得好大嘅轉變，當然屋企多咗個人。」
這句話聽起來無足輕重，但這個「人」卻足以令她牽腸掛肚，常常想放工盡快趕回家！「因為小朋友每一日都有唔同嘅轉變，我諗無一個媽媽會想miss (錯過) 呢個環節。」
當演員的生活是日夜生活顛倒的，從前孜然一人，了無牽掛，然而當生命裡出現了一個不能分割的人時，如何是好？唐寧反而覺得，因為日夜顛倒，才能照顧好同樣「日夜顛倒」的兒子。那些半夜起身餵奶的生活，唐寧都很快適應過來。
要數最吃力的時候，莫過於是兒子俊俊出生後第一個月。她憶述：「開刀有個傷口，會痛，但又唔想miss 咗照顧佢嘅時間。因為我餵人奶，佢好快會肚餓，好快又要食第二轉，所以基本上2、3 個鐘就要餵一次。」
雖然辛苦到「無覺好瞓」，但唐寧沒有埋怨，依然笑得甜絲絲的。「每一次見到佢喊，佢一飲完好飽、好滿足、瞓返好甜的樣子，你會覺得，幾辛苦都值得！」
平衡家庭工作
丈夫鄧偉傑是話劇監製，自己是演員，工作時間同樣彈性，這讓唐寧有時間照顧家庭。
每晚和先生溝通好，大概知道大家第二天的工作流程，好作安排。好像當天早上唐寧要接受我們訪問，先生便會先帶俊俊去玩、去吃東西。待她完成訪問，先生便去上班，由她來接棒。
過了寶寶初生時最辛苦的階段，加上有媽媽、丈夫的支持，後來更請了工人，照顧俊俊不再是一件難事。經理人都要記一功。「我經理人都安排得好好，喺呢段時間幫我盡量安排本地的工作，等我唔使離開香港好耐。」眼前唐寧和無數媽媽一樣，將家庭放在首位，一副有仔萬事足的樣子。
打破框架 快樂教育法
兒子俊俊已經兩歲多，快上幼兒園。坊間不少爸媽已經全副武裝，預早替孩子報讀各式各樣的playgroup、上不同種類的興趣班，為求能替仔仔弄一份好的CV，讀一間好的學校。但唐寧卻擰擰頭，指沒有替仔仔報讀playgroup 和上興趣班。
她說笑：「所以我係比怪獸家長更怪獸，因為我係唔做呢啲嘢。」
她覺得坊間所謂怪獸家長，其實並不一定是錯。「做父母或者教小朋友，無話好唔好，只有適唔適合你地個家庭嘅教育方法。」但選擇了，一定要堅持。「唔好行緊呢條路，突然羡慕人哋就轉呔，我哋要諗清楚自己嘅選擇。」
唐寧一家便選擇了「快樂教育法」——「我地鍾意快樂地教育、鍾意身教，寧願帶佢去周圍玩多啲, 接觸唔同嘅事物，多過只困喺一間課室入面。」
唐寧選擇快樂地教導兒子俊俊
唐寧本身住在村屋，一打開門，附近的大自然環境就成了教育俊俊的最佳教材。「我日日都會喺朝頭早同佢（俊俊）一齊去放狗，我又喺天台種咗菜，得閒會帶佢上去淋花。」她亦鼓勵俊俊多接觸不同的事物。
大多家長怕泥土骯髒，不讓孩子碰，但唐寧卻相反：「唔緊要啊，就掂佢啦，呢啲都係地球一啲物質嚟。希望佢可以無咁多框架。我覺得有時大人有太多模式上嘅框架，框住自己嘅生活，框住自己嘅工作能力。我希望佢咁細個嘅時候，能盡量打破呢啲框架，比佢去接觸所有事物。」
特別是小朋友，他們的觀察力與好奇心都比大人強得多。有很多事，反而不用教導，他們透過觀察便已經學懂。小朋友喜歡模仿動物的叫聲。模仿狗的時候，普通人會汪汪地叫，但俊俊卻反而模仿了狗的抖氣聲。那種聲音，其實才是一隻狗最常發出的聲音。
唐寧希望俊俊自己摸索。「我希望喺佢咁細個嘅時候，去開發佢一個求知、探索嘅心。」
沒有一個家長不想自己的孩子快樂地成長。但面對競爭激烈的香港，大多家長都怕孩子長大後輸在起跑線，那種壓力，唐寧該如何面對呢？
唐寧收起甜蜜的笑容，認真思考了一陣子：「其實我覺得真係要睇父母嘅價值觀。」成績好，長大後獲取一份好工，為人父母，哪個不想？「但我覺得係咪應該培養一個價值觀比佢先呢？」
唐寧雖已為人母，家庭事業兩邊走，但卻依然保持童顏，喜歡大自然的她，究竟有什麽天然護膚心得呢？
愛與分享
近年來，在各大慈善團體的宣傳、山區採訪的電視節目中，都可看見唐寧的身影。經理人透露，從前唐寧投放在慈善工作的時間，可能佔工作的五分一，但現在已經是三分一，將來希望能做到一半一半。
這個改變，當然是因為仔仔。除了希望幫助更多人之外，唐寧最想的是為仔仔起到身教作用。「愛與分享」， 這個便是唐寧最希望教導兒子的價值觀。「我自己都想儲多啲經驗，希望佢一路長大，我可以分享更多經驗比佢聽。」從孩子身上，她亦獲益良多。
小孩的世界總是非常單純，黑白分明。在他們的字典中，沒有工作，沒有壓力，只有如何快樂地玩。就像有一次，俊俊用了一個意想不到的方式，把玩具「反轉」來玩。「有時你覺得個玩具一定係咁玩咩？唔係。（反轉）咁樣仲好玩。」
從仔仔身上，唐寧學懂了不要執著，學懂了如何能更自在地生活。
她自覺自己成熟了：「可以睇到小朋友一路長大，係一件好奇妙嘅事，令我更加明白到做父母係好艱難，但當中又可以有好多樂趣，所以我覺得依家每日都好似一個學生，重新去學習點樣能夠生活得更好。」
身教的重要
唐寧非常支持IKEA 的毛公仔助學計劃。
最近唐寧參與了IKEA「毛公仔助學計劃」，希望能幫助更多兒童。唐寧笑言，自己亦買了很多毛公仔放在家中。雖然仔仔尚未明白，但她會和仔仔一起作捐贈的動作。
「身教係最重要。如果我想佢做某件事，但自己從來都無做，點樣可以令佢切身咁明白呢？雖然小朋友現時未必好明白，所以我自己去做先。」
每一次慈善活動都令唐寧眼界大開。「呢個世界上，我哋以為做了好多，但原來做極都唔夠。係咪唔夠，我哋就更加唔去做呢？每一次我探訪完，我自己都會去諗呢個問題。」
海星不斷被沖上沙灘，有個老人不斷救起海星將它們放回海中。是徒勞無功，還是「幫得一個得一個」？
為人父母，唐寧最大的心願，只想仔仔成為一個懂得愛的人。「唔單止係愛自己嘅家人、愛侶。講緊係對地球，對身邊所有事物嘅愛和觀察。」
簡單的心願，已是唐寧的最大動力。
IKEA 毛公仔助學計劃簡介
顧客凡購買任何毛公仔，IKEA 基金便會捐出HK$10 予聯合國兒童基金會及救助兒童會的兒童助學計劃，為世界各地的兒童提供教育機會，從而改善兒童的福祉及健康，甚至助其脫貧，全力發揮教育的力量！所買的公仔，還可以再捐出來給需要幫助的小朋友呢！
