性格大比拼

如果唔係有2個小朋友，我未必知道每個小朋友，真係有佢自己一個性格~ 聽就聽得多，個個小朋友性格都唔同，但原來同一個肚生出黎，同一個環境長大，同一套教育方法，2個仔既性格可以咁唔同~

呔仔就由細到大都痴身、慢熱、膽小怕事、缺安全感、行事小心、危機感強、粗枝大葉、固執﹐但好可靠、熱心助人、為人正直、極富正義感、同情心、感性、本性善良~

細細就比較獨立、熱情、十分細心、勁識冧女(即係我)、醒目、熱心助人、正義感強、同情心、保護家人﹐但不顧安全、危機感弱、無尾飛陀、古惑、大膽(表面上)、愛面子、易喊~

就咁睇落去，係咪2個D性格完全相反呢~

其實之前有排細細都難攪架，唔知係咪Trouble 2，真係咩都玩對抗。好彩有哥哥領導住佢，先慢慢變返好咋﹗我成日都好感激呔仔，我覺得佢做哥哥做得好稱職﹗好多好既性格，例如正義啦，熱心助人啦，有同情心，善良呢D，我覺得細細係跟佢學返黎~ 睇到哥哥對事物既反應同感受，細細又自然會跟住學。

以細細比較反叛同自主既性格﹐其實佢好容易受人影響學壞，加上佢有少少打交底，如果唔推佢去警惡懲奸，比個責任佢保護家人，佢好容易就會變左壞人，哈~ (所以我響屋企既角色要成日比壞人捉呀，比Monster扯走呀，咁佢2個就會擔當救人既角色，伸張正義﹗) 有哥哥跟，有個好榜樣，而家佢地都做左Hero同警察，立志對付壞人﹗Yeah!!

發現左一樣野都幾得意，就係朋友同佢地2個既相處既感覺。初相識，一定係傾向細細，因為細細熱情肯跟人，而且好快就會同你玩到癲，再加埋佢D 冧女陰陰咀笑(仔都唔放過架﹗) 攬頭攬頸，多數D friend都會死響佢手上，哈~而呔仔就相反喇，由於性格慢熱，同埋好鐘意喱埋響我後面，我推佢出去佢會扭計。最多禮貌上叫你一聲，所以一開始係無人埋到佢身﹗

但其實我反而幾buy佢呢個性格~ 即係我覺得我對住陌生人唔舒服既，我唔一定要表現熱情。最緊要佢又唔會介意人地唔同佢玩，佢根本都唔鐘意同唔識既人玩。我覺得呢D係性格，唔需要話推佢出去要點social，佢只係做佢自己認為舒服既野。當然﹐我會要求基本禮貌，叫人同應人~

講到呢度，唔好以為呔仔就蝕章喎﹗當我D 朋友同佢混熟左，佢肯跟你同你玩，哇﹗勁多野講，又攪笑﹗好多你意想不到既天真善良，真係可以令你覺得好窩心，世界真是太美好了﹗哈~ D朋友就開始講﹐發現呔仔內在性格真係好得人鐘意，一開始佢慢熱，但見多幾次慢慢熟左之後，真係會好錫佢~ haha~ 所以話好多野都唔可以睇表面﹗至於細細，你都會一樣咁錫佢，會遷就佢既任性，因為一開始你已經比佢迷惑左架喇﹗所以佢做咩你都唔捨得責怪佢 (偷笑)

有時會諗，唔知佢地而家既性格，會唔會隨住慢慢長大而改變呢? 而我可以做到既係，希望比到佢地一個快樂既童年，可以抵擋多D外來壞因素，長大後思想一樣正面，保持純真善良既性格~

慢熱善良的呔仔

熱情細心的細細