愛麗斯仙境症

相信好多父母都同我一樣，發現小朋友有咩問題時，就會好努力研究果樣野。醫學問題、心理問題、精神問題等，唔接觸過，都唔知原來咁多奇怪病學。當然啦，唔識好過識，唔識代表未接觸過，即係屋企無人中過招。我算好幸運了，之前講過細細嘅濕疹，大家 google 返「濕疹 shemom 呔媽」呢 D 字眼都會搵到文章的。呔仔就多野 D，哮喘大家都容易搵到資料架喇，今次會分2篇文章講下呔仔發生過嘅2樣古怪野。

1. 「愛麗斯仙境症」

「愛麗斯仙境症」的英文是：Alice in Wonderland syndrome。 症如其名，特徵係病人睇野時，好似愛麗斯夢遊仙境咁，景象變遠同縮小，小到咩程度我真係唔知，未親身經歷過，但據呔仔所講，係我個頭細到佢用2隻手嘅拇指、食指拼埋扮圓形咁細。事緣前幾個月某日，呔仔臨瞓前突然同我講，地下 D 野變到好 mini 呀！我以為佢講笑，佢話係真架，你都好細粒。果刻我個心都離埋，以為佢視力突然有問題，咩視網膜脫落之類，叫佢合埋眼休息一陣，1分鐘左右再打開眼時，佢話正常返，無事了。咁我都唔係好為意，點知連續幾日都有咁情況，維持時間仲愈來愈耐，成半個鐘都試過。其實第2日已打去問醫生，約眼科全面驗查，但都要排症排一星期，果幾日就惟有觀察同記錄變化。

自己上網睇資料又問卜友，發現原來都有小朋友有咁情況，呢個症狀叫「愛麗斯仙境症」，睇野會突然變遠變細，小朋友大病後或身體發炎症後會容易引發，屬過渡性的，時間過左會自然消失。由於呔仔發生時就係腸胃炎左10日之後，咁個心都定 D，唔係對眼有事，係身體對大病後嘅反應。不過呢 D都係自己諗，始終睇眼科驗查左先安心嘅。幸好醫生驗查完佢視力和眼底都正常，應該都係因為大病後引起，唔需要 follow up，如果持續再發生先再搵醫生，又或者長期持續，就有需要做腦掃描搵下係咪其他問題。

好彩地，睇完眼科之後試過1次，之後都無再發生過。咁相信就係因為呔仔腸胃炎後，身體產生變化併發「愛麗斯症」喇。有時都會諗，做咩次次都係呔仔架？！但回心一想，其實人生中咁多艱難咁多經歷，呔仔呢 D 小事又算得係咩呢？多左呢 D 怪事發生，我都平常心面對了，正常就醫，做左自己本分，其他野就由天安排吧！