我為人人

長大﹐真係一樣好奇妙既事。真係好感激weak7咁支持我做一個湊仔婆﹐比我可以每日見到佢地成長﹐可以好深入咁認識同了解我2個仔。近排多樣野﹐就係識要求放學後去踩單車﹐食雞旦仔~ 聽落好似好小事﹐但對我黎講﹐係一個成長既變化。大個仔﹐安排自己想做既野喎﹐我覺得好特別呀﹐哈~

踩單車既平地隔離有個小公園﹐一開始佢地多數會踩架單車過去玩一陣先~ 果日奇怪喎﹐佢地一行到過去就踎左響滑梯隔離﹐我離遠見到以為佢地執樹枝玩﹐仲叫佢地「唔好玩樹枝呀一陣篤到眼呀﹗」

再行近D睇﹐原來滑涕同成地下都散滿左樹枝﹗佢地做緊清道夫清理現場﹐夾手夾腳執晒D樹枝去對面。哇﹗我見到果刻好感動﹗咁細個小朋友會主動去做D件事﹐識得為人著想﹐照顧其他人。 (喂﹗做咩響屋企叫你地執玩具咁難架?? 明恰我呀?) 我讚佢地做得好好呀﹗問呔仔﹐點解你要整走晒D樹枝既? 你又唔係玩~ 佢話「我怕其他小朋友滑落黎時會整親丫嘛~」我聽到佢咁講好安慰呀﹗

平時我同weak7見到有野容易令人受傷會本能反應地即時處理左佢。例如見到地下有灘水呀﹐有玻璃樽呀﹐有野爛左會介手呀… 佢應該係工作上既需要﹐個人經常都好警覺﹐不過佢本身性格都係咁。而我係比佢影響﹐加上湊得仔多﹐好自然危機感變強。其實可以既話自己咪做多少少囉﹐幫到人自己又心安理得。係估唔到我地平時呢D行為﹐原來暗暗地已經過左比佢2個。可能見得我地多﹐齊齊我為人人﹐行俠仗義﹗哈~