我縱仔了！

自問我唔屬縱仔嘅人，當然兩個仔仲細，會好想比佢地嗲下，響無深遠影響嘅情況下，間中就下佢地我都會嘅。但一向對於會影響佢地成長性格，又或做嘅野會影響他人嘅，都一定企硬的。可惜上星期，我意圖縱仔了......

話說上星期放假，同呔仔細細行街。佢地想抽一隻 Kre-O Transformer 公仔，可以砌出黎變形的，每隻3個半美金。得到爸爸點頭，可以一人抽一隻。其實呢隻公仔，上兩星期已抽過一次，咁當然大家都唔想抽返一樣，但抽野嘛，就係有機會一樣啦。當呔仔拆開時發現唔同款，好開心啦！之後到細細拆，佢抽到一隻係一樣的，佢望住哥哥果隻個羡慕樣，我看在眼裡。不過細細又接受喎，完全無表現不滿，無扭計話要抽多一隻，反而仲好開心跳跳紮，仲想開果隻再砌一次，問佢抽到一樣鍾唔鍾意，佢又話鍾意喎！可能係因為咁，令我更想抽多一隻唔同嘅比細細。

我就開始扭我老公喇，不如抽多一次丫，好無？抽多隻比細細啦，佢抽到一樣咁慘 (下冊數10字) ，老公話唔得！話抽野就係有機會抽到一樣，唔可以因為咁而再抽一次，咁如果抽多次又一樣，咁又再抽？？ 其實我同意佢嘅，平時我都會係咁講。又或者咁講，如果細細抽到同一樣係即刻扭計嘅，我更加唔會就佢。但可能因為佢乖，佢知足，所以我更想比好嘅佢，而我，果刻就忘記初衷了。老公繼續話，其實細細性格咁樣係好好，即使佢好羡慕，但佢唔扭計唔要求再抽一個，我地又點可以咁樣破壞佢呢樣野呢? 如果咁小嘅失敗打擊都承受唔到，一定要得到最想要最好嘅野，咁大個之後就經唔起失敗了。

老公講得啱，佢唔要求，我何必因為自己唔捨得佢失望而縱佢呢? 而家係3個半嘅公仔，長大後得唔到嘅野更多！比佢學識知足，學識接受挫敗係好重要的！！我都要緊記，好彩今次老公拉我一把咋，唔係我就做錯事了，後果唔係一隻公仔嘅得失，而係「愛佢變成害佢」，直接減低佢長大後嘅作戰能力架！各位爸爸媽媽，要引以為鑑呀~ ^^