莫忘小友情

我家兩個小朋友，都係怕醜仔。由出世開始日日對住我同爸爸，一家人外出比約會朋友多，佢地都習慣同對方玩，唔太習慣有其他朋友仔。呔仔(大仔)開始返幼稚園時，喊足個半月，又會成日避開一D行得佢太埋既同學。老師話佢鐘意觀察同學仔，多於參與一齊玩。果時有擔心佢會唔會唔太合群，唔鐘意返學咁多小朋友呢? 但返左一年學，見佢都續漸有同同學玩，同埋放學返黎講學校野係好開心的，咁都放心好多。繼而上左小學，哇！不得了，開籠雀咁，呢個同學點果個同學點，以乎完全適應了。而細細就怕醜得黎比較合群，幼稚園時唔會撩人玩，但都鐘意埋堆傾計。同樣上左小學後，見佢小息不停撩同學仔追佢，又有同學黎拖佢手行，似乎人際關係唔錯。

今日又睇仔小息(暗地)，見細細拖同學追逐，同學仔“被捕”時一個頭憾落去條鐵度，唉呀慘喇！痛到同學仔按住額頭坐左響地下，我見到細細好擔心，猛口up up(應該係問痛唔痛，有無事之類)又即刻搵老師黎，然後我見到佢拖住果位同學仔慢慢行入左課室。唔知點解見到呢一幕，我又感動到鼻酸酸(我發覺人大左仲易喊~) 諗起自己小學時幾個好好感情的同學仔，到而家相識25年了，又隔左個太平洋，依然響whatsapp group成日傾計。純純的友情，就係由小時候互相關懷互相幫助建立了，如果細細同呢個同學仔一齊成長，可以keep到咁耐朋友的話，將來提起呢件憾頭事件，應該係個深刻回憶呢！