最渴望的回報

人人都話做人父母，為仔女付出係不問回報。我就話做人父母既，其實日日都望仔女回報架！講緊既，當然唔係金錢物質上既回報啦！我地在乎既，係心靈上既回報。

一直以來，呔仔細細都係幾窩心既小朋友。唔止對我同爸爸，同其他小朋友相處都會顧及別人既感受。響學校留意到呔仔細細既行為，佢地見到地下有野，會幫手執返。同學漏左褸呀飯袋等都會跑去拎返比人。2隻野都幾熱心助人，我幾滿意！

以上呢D事，証明小朋友唔會只顧自己，我已經當係我做媽媽既回報之一架喇。我甚至贊成佢地將自己擺後D，習慣諗左人先，幫左人地先。做人唔怕蝕底唔計較自然多朋友，多朋友一齊玩，返學就更開心啦！^^

而另一樣回報，就係呔細心裡有我喇！好似琴日參加朋友仔生日會，呢邊好興玩一個叫Pinata既遊戲，玩法係小朋友排隊拎支棍扑爆一個巨型厚紙公仔盒，入面一般載滿糖或小玩具，扑爆時會散落一地，成班小朋友就拎住膠袋仔去執。

由於呔細平時甚少機會食糖朱古力，響呢D環境當然更瘋狂啦！但我估唔到既係，當所有小朋友都瘋狂執糖之際，呔仔突然跑黎我度喎！原來佢執左一粒朱古力比我，同我講：媽咪，呢粒你最鐘意食架，我執比你架你開唔開心呀? 之後又轉身跑回糖堆，再執多一渣仔糖，同細佬好開心咁拎比爸爸睇。

果刻我好感動呀！！響呢D咁重要既關頭(對佢黎講好重要架！)，呔仔個心竟然諗左我先，竟然想我開心先！個仔咁錫自已，真係而家諗起都有D鼻酸酸呀！不枉我湊到佢咁肥佬，又晚晚幫佢R背脊。呢D心靈上既滿足，就係我最想要既回報了 ^^

>> 呔仔細細Pinata Game

呔仔執到我最愛的朱古力，跑來比我的一刻(咁岩比我影到佢個興奮樣！hahaha)

唔捨得食阿仔的心意^^