父母你要知! 與子女的朋友式相處

自從做人父母後，好鍾意聽人講下仔女經，特別是D年紀比自己大少少的，聽下佢地講仔女青少年時有咩改變，對自己教仔既方向都會有點得著。前排聽朋友講佢讀中學既仔，同媽媽關係愈大愈唔好，火星撞地球咁，原來係媽媽幫阿仔安排所有事，唔多聽阿仔意見，樣樣事要作主，令阿仔好不滿。

自己都做人媽媽，當然明白佢想為仔女安排當然係自己認為最好既事。仔女響自己心目中永遠係細路，係唔識諗的，所以好多事都希望幫佢安排好，以自己經驗點條明路俾佢行，但原來咁樣，都有可能影響同仔女既關係。最常見既係升大學選科，關乎前途，父母特別緊張。一定覺得仔女要入容易搵錢既科目，先係正路，而仔女一定想入自己有興趣既學科，就咁都已經可以拗一餐。除左呢D大事，原來小事如衣著等，都係父母同子女相處既學問，父母太執著自己一套，可以對子女造成壓力，令佢地咩都唔敢講你知，漸漸影響關係。

咁係咪仔女大大下，做父母就咩都唔管唔理，關係先會好呢? 又唔係架喎！兩個仔小時候，我已經開始俾有限度既選擇權佢地，唔係隨便選的，係比幾樣我認為OK既，比佢地揀。咁樣可以俾佢地覺得自己有話事權，同時訓練佢地選擇後要為後果負責，即係你揀左要食橙，唔好未食完就話唔食，想食蘋果。咁做既效果係，佢地會忠於自己的選擇，又唔會因有太多選擇時，諗極諗唔到自己想要咩。到而家開始大個喇，7歲 8歲，就可以比更多選擇，甚至係佢地自己決定要晚餐食D咩，假期要做D咩，但當然，都係父母掌握之內的。

成日聽人講，仔女大左，父母同佢地既關係要變成朋友一般，唔可以再以身份去控制，或拿主意幫佢地做所有決定。所謂朋友式相處，就係做聆聽者，分享仔女日常事，從旁引導以解決問題。朋友，無論你做錯咩事，應該唔會發癲打鬧吧！因此你會好放心將所有野話佢知。朋友，你唔會驚佢怕左佢，但你會好珍惜佢，唔想令佢失望。朋友，就係唔會睇住你衰，你有事會諗辨法盡力幫你脫險。朋友，就係陪你一齊成長既人！相信父母就係要做到朋友既角色，陪仔女一齊成長，沿途傍住佢，失意時鼓勵佢。希望兩個仔長大後，我同爸爸都可以做到佢地最好既朋友！