簡單一步 令孩子鍾意食蔬菜

湊仔8年，身教及說教令兩個仔既日常生活行為，同自己及老公都好相似。有好多行為唔需要特別教，佢地小朋友己由觀察至學習到好多我地平時做既事以及出發點。當然我自己都有唔少壞習慣，但由於兩個仔跟足，我好多時要提醒自己(或被兩仔提醒)，那些我叫佢地唔好做既野，自己都唔好做，可以講係共同進步吧！

好似前排響Facebook Page貼左張佢地食生西芹既相，網友都好奇，好多小朋友連菜都唔鍾意食，何解佢地會一條條生西芹猛咁食呢? 陣味真係唔係咁多人頂得順！其實唔止咁，佢地仲鍾意食生既蕃茄，生菜，甘荀，蘑菇，紅椒黃椒等，好多蔬果都鍾意生食。我都諗下，點解佢地會鍾意食呢D，然後我發現，佢地細個時，自己經常生食呢D沾醬做沙律，可能佢地見過媽咪咁食，覺得好好食，又係身教的好處。

好多時見到其他父母們，偏食唔奇啦，但響小朋友面前: 依~呢個好臭！依~陣味好核突！又會話我唔食呢D果D！ 我見到覺得，小朋友都未試過既食物，就從大人既舉止中先入為主，覺得唔好食，唔會試，變左大人自己唔鐘意食既野，小朋友都無興趣試。可能在該大人黎講唔係問題，因佢自己都唔食，但我又覺得咁樣唔係太好，至少鼓勵小朋友試唔同食物，佢試左自己唔鐘意無辨法，但唔應該將大人偏食習慣代代相傳吧。

另外，響佢地讀幼稚園時，學校一星期都有兩次食三文治餐，就係配呢D raw veggies，有西芹，蕃茄同埋甘荀仔。到而家響小學，lunch亦會提供一包包的即食甘荀仔，美國學校好興的，我以前讀書都成日食。對佢地黎講，呢D係普通snacks，可能香港小朋友較少咁樣食法。

然後有網友提到要幫佢地搣左西芹一絲絲的根，呢個問題我覺得幾有趣，因為我真係無咁樣諗過。而我自己一向既想法，係覺得佢地咁大個仔有能力判斷係咪要食埋，或者自己搣走佢。當然如果只係得2、3歲，我會小心D處理好先比佢地食，但作為小學生，我就覺得自己唔應該插手太多了。

呢個題目，令我諗起有小朋友唔知道橙裡有核，又以為蘋果係白色的，因為父母一向將生果挑核，切好一粒粒，所以小朋友並唔知道實物係點樣的。當然小朋友仲細的話，父母應該咁做，但如果上小學了，學校派生果都係一個個派，到時仲係咁做，就真係望住個橙都唔識食架喇！同樣道理，西芹的根，我覺得應該叫佢地自己搣(或示範點搣)，而唔係我一早搣好比佢地，否則佢地大個了，可能唔知西芹係有咁多根的，哈哈！

身教最有效，就係做D咩都叫小朋友一齊做，即使唔岩佢地做，都叫埋佢地一齊睇，等佢地有份參與，勝過自己不停口up up說教。好多野佢地見過體驗過，印象係會更入心，所以點解有時我地好出奇，明明無特別教過佢地既野，佢地又會識做架呢? 就係平時見我地做得多，自己學識了。唔好睇少自己平常行為，做事方式態度，對小朋友言行絕對有直接影響架！