約法二三事

相信大家響教仔既過程當中，一定遇過唔少因意見分歧而引起既爭執。兩公婆講多兩句黑口黑面既有，同老一輩更加係各持己見，兩種教法。為避免家無寧日(唔係講得嚴重，我聽返黎都唔少家庭有左小朋友之後就開始出現問題)，其實我地需要既係一家人預早溝通,達成一個大概既教仔共識，咁到時就唔會發生咁多磨擦。

個人經驗，以下幾點係我認為比較重要，大家可以參考下 ^^

1)唔好響小朋友面前爭執

呢點我覺得係最重要！屋企氣氛要和諧，開心，小朋友先會快樂成長。如果爸爸媽媽成日鬧交，又或者因為佢地既事而爭執，黑口黑面，係好影響小朋友既心智成長，會有壓力同陰影。小朋友甚至覺得係自己攪到爸媽鬧交，自信心低落，自責，從而引伸好多情緒問題。大人經常響小朋友面前爭執，絕對會對佢地造成好大傷害！唔好以為佢地細時唔識野，其實響媽媽肚仔入面，佢地已經有感覺有喜怒哀樂。

2)唔好同小朋友講壞話

見過唔少爸爸媽媽，自己有情緒，就會借小朋友發洩。例如同個仔大大聲講(其實又唔係講比個仔聽架喎！)，你爸爸又唔理我地喇！你爸爸淨係掛住踢波！你媽咪又唔帶埋你去街喇！老老實實，你地兩公婆D野，自己關埋門拆掂佢啦！做咩搵個仔黎單打對方呢? 過晒D負面情緒比小朋友，真係唔知為咩！另外就係，唔知點解好多大人都鐘意響小朋友面前講佢爸媽壞話架喎！雖然係講笑，但小朋友未識分真假，一句‘你媽咪唔要你喇！錫晒哥哥/細佬唔錫你喇！’可能響佢心入面已經留下永不磨滅既傷痕架喇。對住小朋友，講野一定要正面，清晰，先會對小朋友有好既影響。

3)教仔時其他人請勿搭嗲

呢樣野只得兩公婆時較易實行，但如果有老人家在場就比較難攪，所以呢一點，大家必須重點討論，達成共識！話得教仔，當然係因為條友仔做左D唔應該做既野，激起你把火，你需要好好‘管教’佢！但如果呢個時候，有人想保住個仔/粒孫，出口阻撓，即係火上加油，咁只會小事化大！

3方面: 第1，阿仔見有人幫拖，唔會覺得自己錯，因為佢會諗，如果我真係錯，點解有人會幫我呢? 咁究竟我應該聽邊個講? 漸漸個小朋友就會是非不分。第2，本身都唔係咁燢既，就係因為有人加把口，攪大件事，結果大人為左爭回面子，加重處罰，真係搵著個小朋友黎攪。第3，要知道教仔時有人幫口，仲要幫到既話，絕對後患無窮！因為而家D小朋友好聰明，知道屋企邊個話事，以後有咩事就識搵救星。如果你屋企有人成日保住你個仔，咁真係要好好傾下呢個問題，否則自己教得辛苦，小朋友亦唔會獲益。

而我比較幸運，老爺奶奶同住時，佢地好尊重我地教仔方式。呔細做錯事，我地教緊，佢地唔會出聲。我地罰緊佢地，老人家唔會埋黎攪攪震。呢樣野直接影響以後個仔聽唔聽爸爸媽媽說話！因為佢地知道做錯事，一定會受罰，無人幫亦無人會救佢地。但唯一係我媽咪(佢地婆婆)黎睇孫，佢地就會放肆，特別是細細。可能係唔同住，少見面，變左好多野都唔會執得咁緊，我可以理解。所以當我媽咪響度，佢地做錯事時，我會拖佢地入房教。而到佢地而家咁大個，已經識分是非黑白。自己做錯事，佢地都唔會比人幫，會甘願受罰，我覺得好安慰(又或者佢地已經知道，幫得一時唔幫得一世，幫完之後仲罰得勁！)

以上係自己小小分享，希望大家用得著 ^^