誰願放手

大家做父母都明白，想小朋友好，自己要響適當時候放手，我都好同意，特別是我2個都係仔，更加應該放手比佢地更多機會學識照顧自己，承擔責任。日常生活佢地好多野都係自己攪掂，除非係有危險性嘅野，例如用刀，較剪等利器先會幫手。一般自理其實佢地唔錯，6歲呔仔近排仲開始自己洗頭沖涼，我覺得佢又長大了。自問自己唔縱仔(我覺得咋)，但唯獨是有一樣野，我好唔捨得放手既，就係同佢地一齊瞓，呢個真係...

兩隻仔一出世就開始同我一齊瞓一張大床，左擁右抱已經有5，6年時間了。

曾經決定過呔仔6歲上小學時就會搬佢地過隔離房，等佢同細細一人一張床，有自己嘅天地。但唔知點解到佢早兩個月6歲時，我又唔捨得。其實佢地都ready了，都會期待有自己嘅床，牆邊有Hero裝飾等等。仔大了，都真係唔可以再同媽咪瞓(好想喊)，唔通瞓到10歲咩，咁樣好變態既，驚佢地大個戀母或者裙腳仔都唔好啦。但每朝早擘大眼就左右兩個豬樣，仲好BB好可愛，真係心甜，令我好不捨！

不過唔得喇，真係要放手。過埋個summer返完香港，黎緊9月呔仔升小一前，就係佢地分房瞓嘅大限喇！(老公已經怒啤緊，其實啤足幾年架喇！哈！)

可能我自己都係同媽咪瞓大的，記得細個都係同媽咪瞓大床，哥哥就自己瞓細床。同媽咪瞓真係好爽，可以晚晚R背，熱又有媽咪撥扇。係到上中學，要趁屋企瞓晒同同學仔喱被竇傾電話(果時好興)先開始要求自己瞓。同埋又開始多私隱呢，少女情懷總是詩丫嘛！哈哈！

係喎！大家有無發現，原來身教呢樣野好奇妙，以前媽咪對我做嘅野，我而家會咁樣湊對仔，晚晚幫佢地R背架喎，掃掃下好快瞓著。幸福嘅童年，真係會令一個人變得快樂，思想正面！希望我地比呔仔細細嘅愛，都會令佢地長大後變成一個快樂嘅人，懂得愛人愛己，用自己正能量去感染他人！

我同對仔嘅快樂回憶，永遠留響我心中^^