講一套，做一套？

今日搭巴士，咁啱有一家人坐喺對面，一個爸爸帶住三個仔女。

成家人都好似好累咁樣，特別係爸爸，一個湊住三個，真係滿面倦容。

突然間，大仔同爸爸講：俾部電話我玩呀？

我屏息靜氣，靜待呢位爸爸嘅回覆，想知道佢會點樣回覆。

呢位爸爸過左三秒後回答：好快就到架啦，唔好玩啦，搭車就休息一下啦。

聽到呢位爸爸可以咁firm咁叫阿仔唔好玩手機，我心裡真的暗暗地為呢位爸爸鼓掌。

但講完呢句說話後，唔夠三秒，我見呢位爸爸伸手入褲袋拎野...

結果，呢位爸爸從褲袋中拎左部智能電話出來，解開左螢幕鎖，仲開埋個遊戲app，遞俾阿仔玩。

阿仔好開心咁接過電話，跟住就全程投入於智能電話遊戲啦。

而呢位爸爸，就繼續抱住瞓緊覺嘅細女，自己就閉目讓神...。

類似嘅情境，我都遇過。原來，都有唔少家長係會「講一套，做一套」。

例如，好似呢位巴士上嘅爸爸，口裡叫阿仔唔好玩電話，但又拎部電話出來俾阿仔玩...

這種「口裡話唔俾仔女做某啲野，但行動上又容許」的情境，仔女會接收到乜野訊息呢？久而久之，仔女會明白到父母的立場並唔強硬，父母的指令係可以唔使理會。亦有可能，仔女會難以明白究竟點樣做先係啱，點樣做會錯; 究竟有乜野係可以做，乜野係唔可以做呢。

「講一套，做一套」係親子管教中嘅其中一大忌。要表裡一致，「講得出，做得到」才是對仔女有益有建設性的親子管教方法。

我記低呢位爸爸嘅片段，並唔係要話佢有幾唔掂。其實係因為我都有犯過類似嘅錯誤。同埋，眼見呢位爸爸要照顧三個子女，他與太太定必經常身心俱疲。好多時都想做好爸爸，有好的情緒狀態，投入去教讓子女。奈何生活充滿挑戰同壓力，每當父母本身已疲憊不堪時，特別容易控制唔到情緒或做錯決定...

為一眾爸打媽打加油打氣。育兒路漫長，在忙碌工作及教養子女之餘，大家都要俾自己透透差差電呀！