這句話=不需要管教小朋友的免死金牌?

早前大家都響網上睇到唔少拜年Post，當中不乏好多關於親戚小朋友來家拜年時搞亂或整爛你D野。其中有一個我覺得講得好岩既，大概係話佢自己小時候每逢拜年時，父母必定再三叮囑去到親戚屋企唔可以亂搞人地既野，要坐定定，做個有禮貌既小朋友之類。但新年期間親友黎屋企拜年，班細路癲左咁，又整爛野，而班親戚只會講句: 細路仔係咁架啦！但佢好想反駁，細路仔唔一定係咁，係無家教既細路仔先會係咁。呢個係有家教同無家教既問題！我好同意呢位網友既說法。

唔知由幾時開始，呢句「細路仔係咁架啦！」可以咁好用，基本上適用於任何場合。而呢句金句亦成為好多父母唔需要管教小朋友既免死金牌， 可以盡情放班細路出黎打擾別人，而自己又唔需要勞氣教仔，幾自私呢！除左話拜年呢D日子會睇得出小朋友有無家教之外，平時其實都有唔少無家教細路既行為令人側目。例如經常見到既，當餐廳係遊樂場，任由小朋友大聲喧嘩、追逐，父母們自己吹水篤電話，望都唔望。我明白唔需要勞氣，唔需要叫住話住真係好爽既！但如果真係唔想出到街勞氣，平時就要努力教育努力灌輸，咁小朋友出到街自然都會受教聽話。大家都係想入黎食餐安樂茶飯，點解要因為你既自私唔想不停話住佢地，就要別人受到騷擾，承受你快樂而帶來別人既痛苦呢?

我又試過，同兩個仔去公園玩時，有個外國小朋友不停走黎搶走我兩個仔玩緊既泥頭車。如果大家一齊響度玩，我地無問題既，當係分享大家一齊玩，但佢係搶左之後跑走喎！第一次我就追返佢，因為我唔知佢拎去邊，如果佢消失風雨中我咪無啦啦無左架車囉~ 好喇，我拎返番去仔度，佢地玩玩下，個細路又黎喎！！喂我唔想又要追住佢跑喎，佢父母又坐到鬼咁遠，完全見唔到佢，結果我又要追去拎返架車，同佢父母講咁樣樣，佢地有話唔好意思。但轉頭，佢又黎過，搞到我兩個仔邊玩又邊驚佢黎搶野，玩都玩得唔安樂。喂點呀，真係嬲嬲地，佢父母做咩唔理佢架?！ 係咪應該貼身跟住個仔，教佢唔可以咁樣搶人野跑走。如果真係話唔聽又控制唔到佢既，你帶佢走啦，無可能比個仔咁樣不停騷擾人，自己就坐到老遠曬太陽攤抖，咩都唔理。就算係公園，得果幾歲仔，你唔怕佢去搞人，都望下佢有無比人搞丫。大家去公園都係想開開心心咁玩，點解要因為你既自私唔想睇仔，就要別人受到騷擾，承受你快樂而帶來別人既痛苦呢?