開口「讚」

時間過得好快，轉眼間，遲仔已經完成左小一課程。由上年九月，到今年七月，整整十個月，好似發生左好多野。

有一晚嘗試回顧一下遲仔喺呢一年裡面嘅成長，發現都有唔少野喎。忍唔住在面書中與親友分享...

「遲仔有以下嘅進步...

1. 大部份日子都可以自動自覺起床，梳洗，食早餐，換校服，探熱，提我地早啲同佢出門口等校車...

2. 上堂應該幾專心，好留心老師講嘅說話，大部份時間都好準確咁抄手冊...

3. 大部份時間都能準確地執好第二日返學嘅書包，帶備需要嘅用品 (只係試過兩三次帶漏野)...

4. 喺學校應該肯聽老師話，亦願意守規距...

5. 喜愛返學，喜愛學校，鍾意老師同學...

6. 大致上能掌握各科目的內容，能跟上進度... (暫不用擔心佢嘅學習能力)

7. 長高左，亦大隻左...

8. 喜愛閱讀，喜愛運動，喜愛音樂及美術...

9. 放學回家，都算主動咁分享學校裡嘅所見所聞...」

其中一位朋友在面書中留言，「記住『兜口兜面』同遲仔講番呀！」

係喎，點解我無諗過直接同遲仔講番？俾佢知道自己嘅進步，俾佢知道爸爸媽媽睇得到佢嘅努力，俾佢知道爸爸媽媽肯定佢嘅小小成就...

雖然好想做一個好爸爸，識得同仔女好好溝通。但係回想最近同仔女嘅溝通情況，原來好多時會做左「日夜天哦」，不斷提佢做呢樣做個樣，話佢呢樣唔得個樣唔好，有時甚至會鬧交駁火...

反而，一啲能造就仔女嘅說話，就收喺心裡面，或只同朋友分享，無親口同佢地講。

感謝呢位朋友喺面書中嘅提醒，能造就子女的正面說話，唔好擺喺心裡面，要開口講，要時常講，講完最後摸下佢地個頭，拍下佢地膊頭，甚至大力抱一抱佢地呢！

（遲仔，願見你慢慢成長，慢慢進步，爸爸會在旁做你的啦啦隊，大大聲支持你，鼓勵你！）