呔媽專欄#228｜學童自殺事件帶來的反思

近日又有學生輕生嘅新聞，每次見到呢啲事情發生都會好心痛，會好嬲點解香港嘅教育制度，逼到班學生哥咁樣！我哋讀書嘅年代，後生仔為情自殺就聽得多，考唔到個試要記大過，個恐懼程度竟然大到要輕生，仲要唔係個別事件，已經有無數學生因學校壓力問題出事，係香港一個壞風氣，的確令一班父母十分擔心！

自己有兩個仔，就快升初中了，我覺得既然改變唔到國家大事，就由自己做父母的負起責任，諗辦法幫佢哋減壓。我覺得有父母支持嘅小朋友，即使出面遇到甚麼壓力，有人傾訴有位發洩，總會找到一個舒適點，好多時就係果一下諗唔通，需要人撐一撐幫一幫，過了就冇事。

讀得書，當然好！但我覺得讀書叻並唔係唯一出路，一個人會成功，係有好多原因，讀書可能只係其一。至少響我朋友圈入面，成功或者高薪的一群都係讀書唔叻的，哈哈！中學時代嘅我，係個野仔嚟，無論響香港定美國都一樣係咁樣逃學cut堂，成個中學階段，超開心超精彩，只係冇咩點讀過書，我永遠係拉車邊咁升班。

到上大學，真係要選major科目，揀左Apparel Design，開始讀Textile同果本3吋厚嘅時裝歷史書，19世紀維多利亞時期果啲呢，唔知做咩好沉醉喎！然後我驚覺自己原來好讀得書㗎喎！可以放低晒啲東南西北中發白，日讀夜讀，瘋狂drop note，考個A Grade番嚟。我就知道，點解啲人成日話，你搵到自己鍾意嘅嘢，就會自然衝過去，至於唔鍾意的，出貓拿個C，僅僅pass就算。

如果你問我細個時係咪應該再多畀心機讀書？再來一次，我都會揀番同一條讀書路，我覺得讀書叻唔叻，係天性嚟，冇得迫，好似我咁講，遇到有興趣嘅科目，你唔迫佢哋都會想知想學。想小朋友鍾意學習，喜愛生命，唔一定要讀書叻，但一定要開心！我同兩個仔講，除咗返學讀書，多啲留意身邊事物，發掘自己喜愛的，佢哋仲有好多時間去製造自己成長嘅回憶，我會希望我兩個仔係咁樣成長。

有時我覺得自己唔似媽媽，我更似佢哋一個朋友，衰啲講句是損友，所以我哋相處得好開心。常聽說，要同仔女做朋友，你先會入到佢哋個世界，佢哋先肯咩都同你講，我相信，我做得唔錯，哈哈！好似家長日，細仔個老師話佢平時功課Reading Log寫太少，一句算數，想我跟一跟。放學我見到細佬，搭住佢膊頭問佢做咩功課寫咁少唔單聲，就咁叫我簽功課，搞到老師發現我冇check就簽名，我勁面矇，係咪想攬炒？

細佬響度笑。大家咁老友，你好我好，識做啦係咪？之後我見到佢呢排啲功課，寫滿晒字，我好開心！