呔媽專欄#237｜我為何不讓兒子沉迷《Fortnite》

我哋嘅小朋友生於一個科技發達嘅時代，接觸嘅電子產品，玩具等等都同我哋細個好唔同。響過去呢10幾20年，無論係手提電腦、手機、電子遊戲，所有電子科技係一日千里，當年我哋唔會諗到嘅通訊方便，今日已經變成生活基本。

中學時我哋苦苦要求媽咪出一部call機，方便大家聯絡，而家嘅小朋友，小學已經有自己一部4G電話，仲有好多apps響入面。就算冇電話，都一定有iPad，因為而家我兩個仔返小學，學校有預備educational game，叫小朋友得閒響屋企做，我諗，可能學校覺得既然個個都玩iPad，不如吩咐同學們做練習，總比玩遊戲有益。一人一部平板電腦，似乎變成生活必需品了。我哋一直堅持唔畀佢哋太早接觸電子產品，特別是外出食飯、去旅遊，我哋會盡量陪佢哋消磨時間，自備玩具、card games，唔希望一家人嘅時間係各自篤手機、打電玩，咁樣會失去咗大家傾偈溝通嘅互動。

「一人一iPad」之後⋯

我兩個仔，早排開始有自己一人一部iPad，興奮非常啦！結果除咗做學校功課外，當然就要玩而家最Hit嘅射擊game: 《Fortnite》！兩個仔玩咗一排，感覺佢哋唔係好妥。玩緊果排，口中成日講點樣殺人、用咩武器，而家畀我哋禁咗，唔可以玩呢種槍擊遊戲，對我兩個仔嚟講，太advance喇！

《Fortnite》(2017)

電子遊戲嚟講，雖然我哋小時候都已經有打機呢樣嘢，而風靡萬年少年嘅射擊遊戲，好似《魂斗羅》呢啲槍game更加係我哋個年代，男仔必玩，但我哋細個個年代，射槍係一粒人仔，拿住黑色一支嘢就係槍架啦！就算換槍，都係短槍、散彈槍、手榴彈等等，全部2D 畫面，你完全唔會覺得自己身處其中。

《魂斗羅》(1987)

由於而家啲電腦動畫實在過於真實，《Fortnite》入面嘅槍彈配件亦有如真槍實彈一樣，大家對射擊game嘅投入程度，猶於自己置身殺戮戰場。有時我見兩個仔打《Fortnite》緊張到好似抽晒筋，嗌晒咁，都叫佢哋relax，只係遊戲一場。我諗打咗一個月左右，咁啱學校家長日，細仔嘅老師提及細仔響學校行為，佢話無論你問佢咩問題，佢都講關於武器的，睇書又全部睇Navy、Army果啲，就連我的志願，佢都寫係做軍人，因為覺得好有型，同埋可以用weapons對抗敵人。

混淆遊戲與現實

老師覺得鍾意從軍冇問題，對武器有興趣都冇問題，但出發點應該係保護國家，敬重軍人等等，而唔係出於覺得殺人好有型。老師講完，我都有啲擔心，然後當我話畀老師聽，可能因為佢哋而家打緊《Fortnite》呢個game，所以樣樣嘢都係關於槍擊。老師知道後大驚，話呢個遊戲係數age13+，其實小學生唔應該玩。由於畫面同槍械太真實，太投入的話，好容易令佢哋將遊戲同現實混淆，覺得現實中槍擊殺人都好平常。

眾所周知，美國呢邊嘅校園槍擊案時有發生，美國政府亦疏於對槍械監管！其實青少年玩呢類槍擊遊戲，真係存在好大危機。聽完老師講，我同老公梗係擔心，加上我哋本身已唔鍾意兩個仔玩呢啲咁緊張嘅遊戲，遊戲就係娛樂，應該輕鬆開心，所以就話學校同老師禁止同學玩呢個game，叫佢哋玩另一啲畀細個仔玩嘅無聊遊戲。雖然佢哋話都有同學玩緊，更低年級嘅都有玩，但佢哋都算聽話，經我哋解釋完個嚴重性，佢哋又冇再沉迷於呢個遊戲了。