媽媽去旅行

話說上個月香港的表弟講起黎緊佢會自己去6日東京玩，佢個湊仔婆表嫂，即係我，表示非常羡慕！唔知係咪我個羡慕樣太可憐，老公竟然提議我join埋表弟去玩，話佢可以請假湊兩個仔，叫我放心去享受假期。老實講，突如期來既假期，我心中非常忐忑！由呔仔細細出世到而家，湊仔7年了，從未試過擺低佢地自己去一星期旅行，平時去邊都會帶埋兩隻野，對上一次自己飛已經係2007年既事。其實我好放心老公湊兩個仔的，佢絕對勝任，因仔大了，懂事唔難湊，只係我自己太耐無享受過完全屬於自己既旅遊，所以到出機票一刻個心都好唔實在 (而表弟話我一上機就會忘卻自己的阿媽身份，佢岩！哈哈！)

最有趣既係，當我響Fan Page提及我會去東京6日之後，好多卜友留言叫我好好享受，又好多媽媽卜友話佢地都等緊呢日，同埋我呢次旅行，帶比好多湊仔婆希望，哈哈！我諗大家日湊夜湊的，同我一樣都好渴望出走一個假期，可以好好充電，然後繼續日以繼夜的湊仔生涯！

兩個仔出晒名痴身，老公話第一晚大仔有訓訓下搵我，喊少少，但當我地whatsapp的時候，仔會話 : 媽咪你玩得開心D啦！食多D野，買多D野！唔使掛住我地架！記得扭蛋比我地呀！聽到咁樣，自己又有少少鼻酸，好似D仔突然大個了，識安撫我。老公又好識做，果幾日安排唔同節目同兩個仔去，等佢地無咩機會掛住我，唔會打攪我喪食喪買。

老公whatsapp所言，原來全日湊住佢地真係唔易，特別是陪訓，第一晚已經比佢地拳打腳踢又不停撐被，完全無覺好訓，更加覺得我值得擁有呢次旅行。真幸運，有個識得體諒自己的老公，同樣地，老公的明白同支持，亦係我從不埋怨湊仔辛苦的原動力呢！