手足之情

有兄弟姊妹，其實對於佢地成長黎講係件好好既事。特別是年紀相若，感情會更加好。呔仔細細日常生活中，都比我好多好感動既時刻。例如每朝一起身一擘大眼，梗係第一時間搵對方，知道響身邊就好似好放心咁。有D咩野飲野食，又會預埋對方果份(通常細細會分好大份比哥哥，而呔仔因為佢太為食，佢會分細份比細佬~) 當然，幾friend都好都一定有爭玩具爭上車先爭媽咪抱既時候。呢D 時候就睇下爸爸媽媽功力夠唔夠深厚喇，haha~ 通常一人一次，公平對小朋友黎講係好重要。又或者用第2樣野引走佢地，好彩佢地都係easy going既人，好少會唔制繼續扭。但其實佢地知道點扭都無用，見好就收喇，唔係盞到時咩都無仲要比人罰，咁大個仔自己識諗架喇~

講返感動事件，話說上星期同仔去反斗城玩。有個迷你車仔玩具，呔仔細細同另一個小朋友一齊玩，有3架細車仔既。其中小朋友拎住果架係警察車，細細好想玩，我叫佢排隊，等人放低佢就可以玩喇~ 點知等呀等，兜埋個圈返黎，個小朋友都未玩完，問佢佢又話自己好鐘意要玩唔會比，佢媽咪企響隔離又完全無反應當睇唔到。我話唔好等啦下次先玩，細細就唔開心(因為一直教佢係玩具店既玩具要一齊share，人地玩緊唔可以就咁搶，要排隊等，可能佢覺得點解排左咁耐都無。正當細細想喊既時候，感動事情就發生喇~

一向極度細膽既呔仔竟然鼓起勇氣行過去同個小朋友講話: 你可唔可以比架車我細佬玩呀? 講完之後佢退後番幾步，明顯勁驚青。 哇！我覺得好堅呀！勁怕事既呔仔竟然夠膽幫細佬出聲爭取！可能呢D響其他人眼中唔係件咩大事，但響我同爸爸眼中真係非常非常感動！！(我而家講起都有D鼻酸酸~)雖然個小朋友仍然係話唔得,但我反而好多謝佢，多謝佢比呢個機會呔仔保護細佬，佢地既成長回憶多左一件值得回味既事，呢個遠遠比玩到果架車更珍貴^^ (但我相信細細唔會咁諗，佢情願玩到部車仔囉，haha~)