放慢腳步的驚喜！

我係一個幾性急既人，諗到就要即刻做，唔等得，要做完晒所有野先訓得安樂果種。就連日常生活家頭細務，我都係鐘意快手快腳，拿拿淋攪掂晒D野。全職媽媽時間有限，基本上係由早做到晚，送仔買菜自己食D野，中午接仔有時去公園玩，然後預備下午茶預備晚飯，洗碗洗衫褶衫，中間仲有時間就執屋拖地，因此私人時間就更有限，早D攪掂晒2個仔，就早D有得抖下做自己野喇！

講到呢度，我就發現我湊仔都有一個大問題，就係我太心急喇，有時會抹殺左佢地學習既機會。好多時佢地想幫手做家務，我已經一馬當先攪掂左！哈！又有時佢地會想幫手褶衫，但我知道佢地攪完一輪，我又要由頭褶過，所以都會耍走佢地，叫佢地做自己既野。其實咁樣係唔岩，漸漸佢地就依賴左我去做，無左呢個責任心，亦學習唔到更多自理。雖然佢地既野已經自己做返，但既然咁有心想幫輕媽咪，我都唔應該因為怕被拖慢而拒絕既！^^

嗯！為左佢地好，我知道我要放慢腳步教呔仔細細一齊做喇！早排開始，我比呔仔細細跟我做家務。佢地好鐘意做清潔，執垃圾之類既工作，咁我就分配左掃地拖地，同埋抹臺凳抹牆既工作比佢地。雖然佢地攪完一輪後我都要跟手抹一次，但佢地開始有板有眼，識得擦地時向一個方向，咁D塵就唔會響後面跌返出黎。睇黎好快，清潔既工作有人接手喇！Yeah！！

有小朋友後，好多野都要重新學習同適應。改變唔一定係壞事，反而好多時會有新驚喜。好似佢地幫手做家務，自己唔心急既話，其實對相方都係一件非常好既事，佢地亦得到唔同既體驗，增加對屋企既責任感。

睇完呢篇文章，希望大家嘗試放慢腳步，比小朋友多D學習空間，可能同我一樣會有新驚喜呢！

~某早上呔仔細細清潔隊又出動喇！~